Ғылым саласын тұрақты қаржыландыру жалғасады. Ғалымдарға ғылыми идеяларын жүзеге асыруға жаңа мүмкіндіктер ұсынылды, деп мәлімдеді білім және ғылым вице-министрі Қуаныш Ерғалиев.
"2 мыңнан астам ғалымға алған грантына қарамастан тұрақты түрде жалақы төленеді. Біз ғылыми-зерттеу институттарын материалдық-техникалық жаңарту жұмыстарын жалғастырамыз. Сондай-ақ, әр ғылыми-зерттеу институтын дамыту стратегиясын бекітеміз және жоғары оқу орны мен ғылыми институттардың тығыз қарым-қатынасын дамыту үшін арнайы кешенді шаралар қабылдаймыз", – деді Қуаныш Ерғалиев.
- Қуаныш Ерғалиев: Қазақстанда алғашқы онлайн университеттер ашылады
- Биыл колледжде тегін техникалық және кәсіптік білім алатындар саны 21% артады
- Халықаралық білім олимпиадасы жеңімпазы мен жүлдегерлері қанша сыйақы алады?
Мұнымен қатар, ол 2022 жылдың 1 қыркүйегінен бастап қазақстандық жоғары оқу орындары студенттерінің стипендиясы 20%, магистранттар мен докторанттардың стипендиясы 15% артатынын еске салды.
"Педагогика мамандарын даярлау бағыты бойынша оқитын студенттер 58 мың теңгеден астам, басқа бағыттар бойынша білім алатындар 37 мың теңгеге жуық шәкіртақы ала бастайды. Магистранттардың шәкіртақысы 86 987 теңгеге дейін, докторанттардың шәкіртақысы 195 мың теңгеге дейін өседі", – деді вице-министр.
Еске салсақ, Маңғыстау және Түркістан облыстарына баратын үздік ұстаздарға әлеуметтік қолдау көрсетілетіні туралы хабарлаған едік. Бұл шаралар аталған аймақтарда білім беру сапасы бойынша үлкен алшақтықты азайтуға бағытталған.
