Тері микозы деген қандай ауру және оны қалай емдеуге болады? Дерматовенерологтан кеңес

Алматы қаласындағы №2 емхананың І санаттағы дерматовенерологы Азадям Ибрагимова микоз тері ауруының пайда болу себебі мен оны емдеу жолдары туралы әңгімеледі. Дәрігердің айтуынша, микозды емдеу саңырауқұлақша түрі, ауру кезеңі және инфекцияның таралу аймағымен тікелей байланысты.

Тері микозы: себебі, белгілері, диагностика және ем

Тері микозы дегеніміз – теріде әртүрлі саңырауқұлақша әсерінен пайда болатын инфекциялық ауру. Бұл инфекция эпидермистің беткі қабаты мен терінің терең құрылымын зақымдайтын, қабыну, қышыну, қабыршықтану секілді жайсыз белгілері бар ауру.

Тері микозының себебі

Микоздың басты қоздырғыштары ашытқы және зең саңырауқұлақтары мен дерматофиттер:

1. Инфекциясы бар адамдармен немесе жануарлармен байланыста болу. Микоз көп жағдайда ауру адам немесе жануармен байланыста болу және аяқ киім, орамал, киім секілді ортақ заттарды пайдалану арқылы жұғады.
2. Лас әрі дымқыл орта. Микоздар көбінесе бассейн, сауна, душ секілді аса ылғалды орталарда таралады.
3. Иммунитеттің әлсіреуі. Диабет, АИТВ, гормоналдық бұзылу секілді созылмалы аурулары бар және иммунодепрессанттар ішетін адамдардың бұл ауруды жұқтыру ықтималдығы жоғары.
4. Гигиена сақтамау және теріні жаралау. Терінің зақымдануы, тілінген жерлер инфекцияның ағзаға кіруіне тікелей әсер етеді. 

Оқи отырыңыз: Адам түнде неге жиі оянады және бұған қанттың не қатысы бар

Тері микозы белгілері

Саңырауқұлақша түрі мен инфекцияның қаншалықты таралғанына байланысты микоз белгілері әртүрлі болып келеді:

• жараланған аймақтағы терінің қабынып, қызаруы;
• тері бетінің қабыршықтанып, жарылуы;
• терінің дызылдап, қышуы әсерінен тершең болу;
• теріде ойық жара пайда болып, күлдіреуі;
• тырнақ айналасының зақымдануы. 

Микоздар терінің әртүрлі бөлігін зақымдауы мүмкін: өкше, саусақ арасы, тырнақ, кеуде, бет, тіпті, шашты. 

Диагностика

Тері микозына диагностика жасау науқасты сырттай қарап шығып, анамнез жинаудан басталады. Диагнозды растау үшін келесі зерттеулер қажет болуы мүмкін:

1. Саңырауқұлақша элементтерін анықтау үшін теріні микроскоппен зерттеу.
2. Идентификация жасау үшін өсірілген саңырауқұлақшаларды пайдалана отырып зерттеу.
3. Саңырауқұлақша түрін нақты анықтауға көмектесетін ПТР-диагностика.

Тері микозын емдеу

Микозды емдеу саңырауқұлақша түрі, ауру кезеңі және инфекцияның таралу аймағымен тікелей байланысты. Инфекция таралуын тежеп, ауруды асқындырып алмас үшін емді ертерек бастаған жөн. 

1. Антифунгальды препараттар

Тері микозын емдеуге арналған кең таралған препараттар:

• топикалық препараттар;
• терінің зақымданған бөлігіне жағатын клотримазол, миконазол, тербинафин секілді заттары бар кремдер, жақпа май және спрей.
• ауру қатты асқынған кезде қолданылатын итраконазол немесе флуконазол секілді жүйелік препараттар.

Оқи отырыңыз: Ораза алдында кімдер check-up өтуі тиіс және ашығып қалмау үшін не істеу керек

2. Тері күтімі

Гигиена ережелерін сақтап, табиғи маталардан тігілген кең киім кию қажет. Сондай-ақ ылғал мен терлеуден аулақ болып, аяқ киім мен шұлықты жиі ауыстыру пайдалы. 

3. Рецидивтердің алдын алу

Емдеу курсы аяқталған соң, профилактикалық препарат ретінде саңырауқұлақшаға қарсы дәрілерді пайдаланған артық болмайды. 

4. Қосымша шаралар

Тырнақ зақымданған кезде арнайы саңырауқұлақшаға қарсы лак қолданылып, ота жасалуы мүмкін. 

Тері микозын алдын алу

Тері микозын болдырмау үшін бірнеше маңызды ережені ұстану қажет:

• жиі жуынып, терінің толықтай кебуін қамтамасыз ету. Әсіресе қолтық асты мен саусақтар арасы;
• жеке гигиена заттарын қолдану;
• бассейн, душ, жаттығу залы секілді қоғамдық орындарда жалаң аяқ жүрмеу;
• тырнақ пен теріге көңіл бөліп, қабынған жағдайда бірден дәрігерге көрініңіз. 

"Тері микозы – уақытылы емді қажет ететін, кең таралға ауру. Дұрыс диагностика жасап, ауруды емдеген жағдайда ешқандай жайсыздық сезімі болмайды. Инфекцияны болдырмау үшін алдын алу шаралары маңызды рөл ойнайтынын ұмытпаңыздар. Ал маманға ертерек жүгіну көптеген мәселенің алдын алады", – деп қорытты Азадям Ибрагимова. 

Оқи отырыңыз: Ерлерге қарағанда әйелдер жиі шалдығады. Циститтің себебі не және оны қалай емдейміз