Ерлерге қарағанда әйелдер жиі шалдығады. Циститтің себебі не және оны қалай емдейміз

Цистит дегеніміз – қуықтың қабынуымен байланысты ауру. Ер адамдарға қарағанда әйелдер циститпен жиі ауырады. Мың ер адамның сегізі циститке шалдыққан болса, әрбір үшінші әйел өмірінде кемінде бір рет болсын осы аурумен ауырған. Екіншілерінің жартысында цистит асқынып, созылмалы ауруға айналған. Осы орайда №2 қалалық емхананың уролог-андролог дәрігері Азамат Азимтаев осы аурудың басты белгілері, себебі және қанша уақытта емделетіні туралы әңгімеледі. 

Дәрігер циститтің бактериалды, созылмалы және сәулелі деген үш түрі болатынын, емді дұрыс жүргізу үшін аурудың түрін ажыратып алу маңызды екенін айтады. 

"Циститтің ең басты төрт себебі бар. Біріншісі – қуыққа суық тигізіп алу. Екіншісі – Escherichia coli бактериясының қозуы. Бұл бактерия адам ағзасында әрдайым өмір сүреді, тек иммунитет төмендеген кезде күшейеді. 90 пайыз жағдайда осы бактерия ауруды асқындырады. Үшіншісі – адамның психологиялық жай-күйінің дұрыс болмауы, яғни күйзеліс. Себебі күйзеліс кортизол деңгейін жоғарылатады. Осының әсерінен иммунитет төмендеп, тағы да бактериялардың көбеюіне алып келеді. Төртіншісі – онкологиялық ауруларға сәулемен ем жүргізгенде қуықты зақымдау" – деп түсіндірді уролог. 

Ары қарай дәрігер циститтің басты екі белгісін атады. Ол – кіші дәреттің жиілеуі және зәр шығарған кезде қуықтың ашып ауыруы. 

Оқи отырыңыз: Шертпе дегеніміз не және ол қандай ауруларға ем

"Егер адам кенеттен кіші дәретке күніне жеті реттен көп барса, онда цистит болуы мүмкін. Ал жылына цистит 4-5 рет қайталанса, онда бұл созылмалы ауру болғаны. Емді ертерек бастау арқылы созылмалы ауруға айналуын алдын алуға болады. Ешқандай аналогтары жоқ "Уроваксом" деген дәрі өте жақсы көмектеседі. Бірақ оны ішпес бұрын дәрігерге барып қаралған жөн. Сондай-ақ "Канефрон" деген шөп дәрінің де пайдасы бар. Яғни циститті емдеу үшін міндетті түрде бактерияға қарсы дәрі қолданған жөн", – деді дәрігер. 

Азамат Азимтаевтың айтуынша, анатомиялық ерекшелігіне байланысты бұл ауруға көбінесе әйел адамдар шалдығады. Мұнымен қатар, қуықтың қабынуына жеген тағамдар аса әсер етпейді. 

"Әйел адамдардың зәр каналы жеті жарым ғана сантиметр, ал ерлердікі 12 сантиметр болады. Сондықтан әйелдердің қуығына бактериялар тез өтеді. Ең бастысы – циститтің асқынған түрін 5-7 күнде, ал созылмалы түрін 10-14 күнде емдеп жазуға болады. Ем кезінде иммунитетті нығайтуға, кортизол деңгейінің жоғарылап кетпеуіне жағдай жасау, күйзелістен аулақ болу маңызды", – деді Азамат Азимтаев. 

Оқи отырыңыз: Бүйрегі ауыратын науқастар саны үш жылда 22 пайыз өсті. Аурудың қалай алдын алуға болады