Алматыға қайта айналып келетін туристер саны 78,6% өсті. Бұл немен байланысты

Қазақстан экономикасы үшін туризм саласының стратегиялық маңызы зор. 2023 жылғы наурыз айында "2023-2029 жылдарға арналған туризмді дамыту концепциясы" мақұлданып, онда туризм Қазақстан Республикасы үшін басты ұлттық басымдықтардың бірі ретінде белгіленген.

Бұл сала жергілікті кәсіпкерлер үшін тиімді бизнес бағытына айналады деп жоспарланып, мемлекет, бизнес және жұмыс күші үшін мультипликативті әсер тудыруы күтілуде. Сонымен қатар, туризм саласындағы жұмыспен қамту көлемі 800 мың адамға жетіп, осы сектордың жалпы ішкі өнімге қосатын үлесі 6 триллион теңгені құрауы мүмкін. Бұл көрсеткіштер Қазақстанның экономикалық өсімін ынталандырушы факторлардың бірі ретінде туризмнің әлеуетін айғақтайды.

Туризм саласында маңызды рөл атқаратын көрсеткіштердің бірі – рейстер саны екені белгілі. Алматының танымалдығы артқан сайын, қалаға келген туристер саны да өсіп отыр, бұл туризм индустриясының күшті дамуына ықпал етеді.

Сондай-ақ, Tourism Insights дерегінше, Алматы Орталық Азиядағы туристік іздеу сұраныстарының 29,7 пайызын иеленіп, Қазақстанның басты туристік орталығы мәртебесін сақтап отыр. Бұл көрсеткіш өткен жылмен салыстырғанда 2 пайызға өсті. Мұндай өсім әуе рейстерінің ұлғаюымен байланысты: Алматыға рейстер саны дәстүрлі әуе компанияларында 24,7 пайызға, ал лоукостерлерде 44,5 пайызға артты. Қайта келуші туристердің үлесі 25 пайызға жетіп, 78,6 пайызға өсті. Сонымен қатар, ірі шаралар алдында туристердің билеттерді ертерек іздеу уақыты 24 пайызға көбейіп, қазір 40 күн бұрын сатып алуға тырысады.

Оқи отырыңыз: Алматыда шетелдік туристер саны 73 пайыз өсті

"Алматыға рейсті алдын ала брондайтын жолаушылар саны 1,5 есе өсті, бұл қолжетімді рейстердің көбеюімен байланысты екені байқалады. Аталған үрдіс әсіресе Қытайдан келетін жолаушылар арасында айрықша көзге түсуде, 2024 жылдың бірінші жартыжылдығында Қытайдан Алматыға жасалған брондаулар саны 6 есеге артып, 25,2 мың билетке жетті. Сонымен қатар, ең көп брондау саны Түркиядан жасалған, бұл Қазақстан мен Түркия арасындағы тығыз іскерлік байланыстардың нәтижесі деп айтуға болады", – деп мәлімет берді Almaty Tourism Bureau баспасөз қызметі. 

Бұдан бөлек, Алматыға келетін туристер арасында белсенді демалыс түрлері үлкен танымалдылыққа ие болып жатыр. Олардың 54 пайызы табиғат аясындағы турлар мен экскурсияларды таңдаса, 44 пайызы джип-турларға қызығады. Бұған қоса, қаладағы гастрономия, шоппинг және ойын-сауық орындары туристердің жоғары бағасын алып отыр, соның ішінде 70 пайызы осы салаларға оң пікір білдірген. Отбасылық туризм де қарқынды дамуда, жағымды пікірлер үлесі өткен жылға қарағанда 12 пайызға өскен. Сонымен қатар, қалада іскерлік белсенділік те артып келеді, бұл инвестициялар мен халықаралық форумдардың көбеюіне байланысты. Аталған саланың шығындары үш есеге өсіп, Алматының экономикалық дамуына үлкен үлес қосып жатыр.

Оқи отырыңыз: АҚШ, Германия, Үндістан: Шетелдік туристер Қазақстанға қанша күнге келеді?

Алматы қаласының әуежайы арқылы транзит жолаушылар санының артуы оның халықаралық бағыттардағы маңызды рөл атқаратынын дәлелдейді. Бұл үрдіс Алматының демалыс пен іскерлік сапарлар үшін танымал бағыт болып қала беретінін тағы бір рет растап отыр. Қаланың туристік секторы қарқынды дамып келеді, бұл аймақтағы инфрақұрылымның дамуына және туристерге ұсынылатын қызметтердің сапасының артуына ықпал етуде. Осылайша, Алматының аймақтық және халықаралық туризм орталығы ретіндегі позициясы нығая түсті.

Шоқан Уәлиханов маршрутын құрастырса, оған қай жерлер кіреді?

Қазақ спорт және туризм академиясының туризм ҒЗИ жетекші экскурсовод-әдіскері, материалдық емес мәдени мұра жөніндегі ЮНЕСКО ұлттық комиссиясының мүшесі, Ұлы Жібек жолы тақырыбы бойынша ҚР ұлттық жаттықтырушысы Бақыт Оразымбетова Informburo порталына берген сұхбатында Қазақстанда туристер міндетті түрде баруы керек жерлерді атады. 

"Ішкі туризмді дамыту және ұлттық мәдени мұраларды сақтау мақсатында әлемде ортақ концепцияға айналған туризм кластерлерінің маңызы зор. Мұндай кластерлер арқылы ішкі туризмдегі ұлттық маңызы бар маршруттар анықталып, арнайы құжаттар құрылған. Өкінішке орай, Қазақстанда әлі осындай кешенді құрылым толық қалыптаспаған. Дегенмен, еліміздің мәдениеті мен тарихын дәріптейтін маршруттар қатарына Мұқағали Мақатаев, Абай Құнанбаев, Шоқан Уәлиханов сияқты ұлы тұлғаларымыздың туып-өскен жерлері, Құрманғазы, Қобыланды және басқа да батырларымыздың жүрген жолдары, кесенелер мен ірі тарихи шайқас орындары кіруге лайық. Бұл дара тұлғаларымызға тағзым ету оларға бір табан жақындата отырып, олардың өмір сүрген дәуірін сезінуге мүмкіндік береді. Осылайша, қазақстандықтар мен шетелдік туристер еліміз бен халқымыздың мәдениеті мен өнерін тереңірек таниды. Сонымен қатар, жас ұрпақ өзінің елін, жерін сүюге, құрметтеуге тәрбиеленеді. Ұлттық құндылықтарды дәріптеу арқылы ұрпақ сабақтастығын сақтау және ішкі туризмді дамыту – Қазақстанның жарқын болашағының кепілі", – деді Бақыт Оразымбетова. 

Оқи отырыңыз: Іле Алатауы, Бурабай, Көлсай. Қазақстанда туристер ең көп баратын 5 мекен

Мұнымен қатар, экскурсовод Шоқан Уәлиханов маршрутын жасауды ұсынып, оған қай жерлер кіруі керектігіне тоқталды. 

"Шоқан Уәлиханов маршрутымен Қазақстан бойынша тур жасау – бұл тарихи және географиялық танымдық сапарға тамаша мүмкіндік. Бұл гранд тур Қостанай облысындағы Күнтиместен басталып, солтүстікке қарай Сырымбетке, Ом және Оңтүстік-Шығыс Қазақстанның Алтын-Емел ұлттық паркіне, осыдан кейін Қытайдағы Қашқар қаласына дейін созылады. Соңында тур Есік өзеніне келеді. Бұл бағыт тек туристік қыдыру ғана емес, сонымен қатар тарихи зерттеу жүргізуге мүмкіндік береді, өйткені барлық ақпаратты ғылымға негіздеу маңызды. Турға қатысушылар тарих, мәдениет және табиғатты зерттеу арқылы Шоқан Уәлихановтың өмірі мен мұрасына жаңаша көзқарас ашады. Сонымен қатар, маршрут ішінен турлық нысандарды таңдап, жеке саяхат жоспарларын құру мүмкіндігі беріледі", – деді Бақыт Оразымбетова.