Қазақстан азаматтары зейнетақы жинақтарын қалай жұмсайды

Қазақстан азаматтары зейнетақы жинақтарының 4,33 триллион теңгеден асатын мөлшерін тұрғын үй жағдайын жақсартуға және емделуге пайдаланды. Орындалған өтініш саны – 2,52 миллион. Бұл туралы БЖЗҚ баспасөз қызметі хабарлады.

Тұрғын үйге

2021 жылғы қаңтар мен 2025 жылғы 1 қаңтардағы жағдай бойынша тұрғын үй жағдайларын жақсартуға арналған 1 885 252 өтініш орындалған. БЖЗҚ қазақстандықтардың уәкілетті оператор-банктерде ашылған арнайы шоттарына шамамен 3,74 триллион теңге аударған.

Тұрғын үй жағдайын жақсарту мақсатындағы біржолғы зейнетақы төлемдерінің орташа сомасы – 1,98 миллион теңгеден асады.

Тұрғын үй жағдайларын жақсарту бойынша орындалған өтініштердің ең көп саны Алматы (20,66%), Астана қалаларының (20,12%), Маңғыстау облысының (9,47%) тұрғындарынан түскен.

Емделу

Қор емделу үшін жалпы сомасы 593,19 миллиард теңге болатын 639 251 өтінішті қанағаттандырған. Алынған соманың орташа мөлшері 0,93 миллион теңге.  

Өтініштердің 97,07%-ы стоматологиялық қызмет алуға, 2,16%-ы офтальмологиялық қызметтерді алу бойынша орындалды. Қалған медициналық бағыттарға зейнетақы жинақтарының 1%-дан аз мөлшері пайдаланылды.

Зейнетақы жинақтарының тиесілі бөлігін емделуге ақы төлеу мақсатында игеру бойынша Алматы қаласының (емделу ақысын төлеу бойынша орындалған өтініштердің жалпы көлемінің 14,35%), Атырау облысының (14,07%), Астана қаласының (12,51%) тұрғындары басым белсенділік танытты.

Салымшылардың БЖЗҚ-дағы ЖЗШ-на шамамен 54,66 миллиард теңге қайтарылды. Бұл қаражат өтініш берушінің өтініші және өзге де себептер бойынша белгіленген мерзімде пайдаланылмаған.

Жеке инвестициялық басқару

Инвестициялық портфельді басқарушыларға (ИПБ) биылғы жылдың 1 қаңтарындағы жағдай бойынша 2021 жылдан бастап 62,25 миллиард теңге аударылды. БЖЗҚ 33 079 өтініш берушіден түскен 46 608 өтінішті орындаған. Аударымның орташа сомасы шамамен 1,34 миллион теңге.