Қалың қар мен боран: Қазақстан-Ресей шекарасында көлік кептелісі пайда болды

Қазақстан мен Ресей шекарасындағы "Сырым" өткізу бекетінде қалың қар мен боранға байланысты 500-ге жуық жүк көлігі кептеліп тұр, деп хабарлайды Мемлекеттік кірістер комитеті.

Баспасөз қызметінің мәліметінше, кептеліс 13 желтоқсанға қараған түні басталған.

"Сырым" авткөлік өткізу пунктінде Ресейге қарай 450-500 жуық жүк көлігі жиналып қалды. Кептеліске Батыс Қазақстан облысы мен Ресейдің Самара облысында ауа райының нашарлауы –  қалың қар, боран, көктайғақ себеп болып отыр", – делінген хабарламада.

Ресейдегі федералды трассаларда қозғалыс уақытша шектелген.

"Шектеу шамамен бүгін сағат 22:00-ге дейін алынбайды. Осыған байланысты жүк көліктері қозғалысын жалғастыра алмайды. Олар күннің ашылғанын күтіп отыр", – делінген хабарламада.

Жүргізушілерге, сонымен қатар басқа облыстардағы жақын маңдағы өткізу бекеттеріне бару ұсынылған.