Мемлекет беделіне нұқсан келтіретін арзан сөздерді қоғам болып тыйған ләзім – президент кеңесшісі

Президент кеңесшісі – баспасөз хатшысы Берік Уәли Aiqyn басылымына берген сұхбатында мемлекет басшысы Қасым-Жомарт Тоқаевтың Үкіметтің кеңейтілген отырысында елге лақап ат таңып жүргендерді сынағанын еске алды. 

"Әлбетте. Қазір адамдар әлеуметтік желілердегі қажетті-қажетсіз ақпарат тасқынынан өзін қорғай алмай, сана сүз­гісінен өткізбей, әртүрлі ойдың жетегіне оңай ілесетінін байқауға болады. Бұл, өкінішке қарай, кейбір азаматтарымыздың алтын уақытын тиімді пайдалана алмай­тынын, жеңіл-желпі бөстекі сөзге үйір екен­ін меңзегеннен айтылған пікір бола­­тын. Мемлекет азаматтардың қалауын шектемейді. Бірақ әлеуметтік желіні де тиімді пайдаланып, табыс табуға, қоғамдық ой-сананы озық ету үшін үлес қосуға болады. Сондықтан әлдекімдердің қарау ниетінен, тіпті қоғамдық пікірді манипуля­циялаудан туатын, мемлекет беделіне нұқсан келтіретін арзан сөздерді қоғам болып тыйған ләзім", – деді президенттің баспасөз хатшысы. 

Оқи отырыңыз: "Ақылға сыймайтын нәрсе". Президент елге түрлі лақап ат таңып жүрген белсенділерді сынға алды 

Берік Уәлидің түсіндіруінше, президент Қасым-Жомарт Тоқаев осыған үндеді. Оның айтуынша, Қазақстанның жақсы атын ел азаматтары шығарады. "Заң мен тәртіп" қағидаты да осыған негізделген. 

"Біз өзіміздің құ­қығы­мызды қалай қорғасақ, мемлекетіміз­дің де беделін солай сыйлауға әрі қорғауға тиіспіз. Сонда ғана еліміздің еңсесі кө­тер­­іледі. Сол үшін бір-бірімізді бекер жәбірлемей, ортақ игі іске жұмылып, мем­­лекетшілдік сананы орнықтыра бер­геніміз жөн. Қадыр Мырза Әлінің "Тәу­ел­сіздікті сәт сайын қорғау керек" деген қанатты сөзі бар. Мемлекеттің ар-намысы әр азаматының ұяты мен ожданына ай­на­луы керек", – деді Берік Уәли.