Бюджеттен қаржыландырылатын 180 спорт түрі ішінде тек 18-інен ғана Олимпиада медалі бұйырады

Туризм және спорт министрі Ербол Мырзабосынов "Егемен Қазақстан" басылымына берген сұхбатында Сенат депутаттарының қарауына өткен "Дене шынықтыру және спорт туралы" заң жобасының ерекшеліктері туралы айтты. 

"Заң жобасында отандық спортқа оң өзгерістер әкелетін маңызды жаңашыл­дықтар қамтылған. Біріншіден, басым спорт түрлерін анықтаймыз. Оларды рей­тинг негізінде емес, Олимпиада, Па­ралим­пиада, Сурдлимпиада, Азия, Пара Азия ойындарының нәтижесімен қалып­тастырамыз. Қазір елімізде 180-нен ас­там спорт түрін дамытуға күш салынып отыр. Бұ­лардың барлығы бойынша спорт резерві даярланады. Бірақ жыл сайын 13 жазғы, 5 Қысқы олимпиадалық спорт түрінен ғана ме­даль бұйырады. Осының бәрі – спортшыларды даяр­лау жүйесіндегі сәтсіздіктердің салдары", – деді Ербол Мырзабосынов. 

Оқи отырыңыз: Қысқы Азия ойындары – 2025: Қазақстан кімдерге үміт артып отыр

Министрдің айтуынша, жыл сайын уәкілетті орган ретінде Ба­лалар-жасөспірімдер спорт мектептері мен мектеп-интернаттарға арналған шығындардың өскенін байқалған. Шығынның көп бөлігі олимпиадалық емес спорт түрлеріне жұмсалады. Заң жобасын әзірлеу барысында жақын (Өзбекстан, Беларусь), алыс шетелдердің (Ұлыбритания, Германия, Норвегия) халықаралық тәжірибесі зерттелген.

"Заң жобасына сәйкес спорт федера­цияларының қызметі де өзгереді. Қа­зіргі уақытта жергілікті, өңірлік, рес­пуб­­ликалық федерациялар жеке субъект саналады. Олар бір-бірі­не бағынбайды. Тиісінше, спортты да­мытуда тәуелсіз сая­сат жүргізеді. Осы­ның бәрі мүдделер қақтығысына, жауап­кершіліктің босаң­суына, спортты дамытудың баяулауына әкеледі. Ұсы­нылып отырған модель жергілікті федерациялардың аккредиттелген республикалық (өңірлік) спорт федерацияларына бағыныштылығын көздейді. Осыған байланысты заң жобасы аясында жоғары жетістіктер спортына жататын бағыттарды нақты шектеу ұсынылады. Бұлар – Олимпиада, Паралимпиада, Сурдлимпиада, Азия, Пара Азия ойындары бағдарламасына енгізілген спорт түрлері, сондай-ақ ұлттық спорт түрлері. Олардың ішінде медаль нәтижесі жоғары спорт түрлері басым спорт түрлеріне қосылады. Тиісінше, республикалық әрі жергілікті деңгейде бірінші кезекте қаржыландырылады", – деді министр. 

Оқи отырыңыз: Париж Олимпиадасының қазақстандық жүлдегерлері комикс кейіпкерлеріне айналды

Жаңа заң жобасына сәйкес, спорт резерві тек жоғары жетістіктер спорты бойынша даярланады. Бұл жұмыс уәкiлеттi орган бекiтетiн спорттық даярлықтың ұлттық стандарттарына сәйкес қатаң жүргiзiледі.