Ұлттық қауіпсіздік комитеті деструктивті діни ағымды жақтаушы Қазақстанның бес азаматы мен бір шетелдікті ұстады.

Терроризмге қарсы іс-шаралар тамызда Алматы қаласында, Қарағанды, Түркістан, Ұлытау облыстарында өткізілді.

"Олар өшпенділік пен зорлық-зомбылық идеологиясын әлеуметтік желілер арқылы және басқа да жолдармен таратты деген күдікке ілінді", – делінген хабарламада.

Оқи отырыңыз: ҰҚК: Қазақстанның 3 өңірінде терроризмді насихаттаған топ ұсталды

Заттай дәлелдемелер табылды және алынды, оның ішінде үш граната бар.

"Күдіктілердің екеуі бұған дейін тонау және ұрлық жасағаны үшін сотталған. Ұсталған адамдарға қатысты Қылмыстық кодекстің 256-бабы бойынша сотқа дейінгі тергеп-тексеру жүргізіліп жатыр", – делінген хабарламада.

Қылмыстық-процестік кодекстің 201-бабының 1-бөлігіне сәйкес өзге ақпарат жария етілмейді.