Қазақстандық саяхатшы Сәрсенбай Қотырашов Өскеменнен Бейжіңге дейінгі жаяу сапарын аяқтады. Бұл сапарға ол 2 тамызда аттанған болатын. 3 айға жоспарланған жаяу саяхатты ол 2 ай ішінде тәмамдады.

Сәрсенбай Қотырашов Қытай астанасы Бейжің қаласына Алтай өңірі және Моңғолия аумағы арқылы барған.

"Мен өзімнің жаяу саяхатымды алдағы V Дүниежүзілік көшпенділер ойындарына арнаймын. Біз көшпенділердің ұрпағымыз және олардың бай мәдениеті мен мұраларын әлемге танытқым келеді. Мен Алтай және Моңғолия арқылы Қытайға дейін жетуді жоспарлап отырмын", – деген болатын Сәрсенбай Қотырашов сапарға аттанатын кезінде.

Оқи отырыңыз: Қазақстандық 74 жастағы марафоншы Қытайға жаяу барады

Сәрсенбай Қотырашов. Фото: ҚазАқпарат агенттігі

Айта кетейік, бұл – 74 жастағы Сәрсенбай Қотырашовтың үшінші жаяу саяхаты. Бұған дейін марафоншы 2022 жылы 72 жасында еліміздің 17 облысын аралап, жарты жылда 8 мың шақырым жол жүрген болатын. Ал өткен жылы ол Атыраудан Ыстанбұлға жаяу барып, 3 мың шақырым жолды жаяу жүрді.

Сәрсенбай Қотырашов төртінші сапарын 2025 жылы Америка құрлығында ұйымдастыруды жоспарлап отыр. Бұл ретте ол Атлант мұхитының жағасынан Тынық мұхитының жағасына дейін жүріп өтпек.

Оқи отырыңыз: Әлемді жаяу шарламақ 73 жастағы ақсақал Гиннесс рекордтар кітабына енуді көздеп отыр