Мәжіліс депутаты Елнұр Бейсенбай премьер-министр Әлихан Смайыловтың атына жолдаған депутаттық сауалында студенттік жатақханалар салу мәселесін көтерді.

Оның айтуынша, Amanat партиясының сайлауалды бағдарламасына сәйкес, 2021-2025 жылдар аралығында Қазақстанда 50 мың орынға арналған студенттік жатақханалар салынуы тиіс.

"Қазақстанда 1 миллионнан астам студент білім алады. Ал студенттерге жатақхана жетіспеушілігі 85 мыңнан астам орынды құрап отыр. Яғни 85 мың студент пәтер жағалап, оқуды емес, керісінше пәтерақының қамымен жүргені ой салмай ма", – деді Елнұр Бейсенбаев.

Депутаттың дерегінше, cтуденттер жатақханасының ең жоғары жетіспеушілігі Нұр-Сұлтанда (17 мың), Алматыда (35 мың), ал Шымкентте (10 мың) байқалады.

Оқи отырыңыз: 

Елнұр Бейсенбаев 2021 жылдың қорытындысы бойынша 10 364 орынға арналған 49 жатақхана іске қосылғанын және биылғы жоспарға сәйкес 35 жатақхана іске қосылуы тиіс екенін алға тартып, бұл процесстің өте баяу, әрі тиімсіз шаралардың әсерінен уақытында орындалмайтын қаупі өте жоғары екенін айтты.

"Биыл салынуы тиіс 10 мың орындық жатақхананың 6 ай ішінде тек 1320 орынға арналған алтауының құрылысы аяқталған. Бұл жалпы құрылыстың 13-ақ пайызы. Оған қоса, 3,5  мың орынға арналған 9 жатақхананың құрылысы, яки биыл салынуы тиіс нысандардың 35 проценті бойынша құрылыс жұмыстарының аяқталуы екіталай", – деді депутат.