Ақтауда көпфункционалды қонақ үй-туристік кешені салынады. Бұл туралы Қазақстан экономикасын жаңғырту мәселелері жөніндегі мемлекеттік комиссияның отырысында белгілі болды.

"Бұл 170 млрд теңге инвестиция тартуға, 4000-ға жуық тікелей және жанама жұмыс орнын ашуға, сондай-ақ Маңғыстау облысына туристік ағынды 850 мың адамға дейін ұлғайтуға мүмкіндік береді", – деп жазылған үкіметтің баспасөз қызметі таратқан хабарламада.

Үкімет басшысы Әлихан Смайылов жобаны жедел іске асыруды және құрылысы басталған барлық объектіні аяқтау үшін "Қазақстан Даму банкі" АҚ бюджеттік несие бөлу мүмкіндігін қарастыруды тапсырды.

Оқи отырыңыз: Туристік уикенд: Қазақстанда қысқамерзімді турларға сұраныс қандай?

Сонымен қатар отырыста салық салу нормалары, Қызылорда облысының Арал ауданында кальцийленген сода өндіру зауытын салу жобасы да қаралды.

Хабарламаға сүйенсек, жоба іске асса, шамамен 140 млрд теңге инвестиция тартып, 700-ден астам тұрақты жұмыс орнын құрылады және жылына 300 мың тоннаға жуық өнім өндіру есебінен импортты алмастыруға мүмкіндік туады.

Премьер-министр зауытқа қажетті инфрақұрылым құрылысын қаржыландыру мүмкіндігін қарастыруды, сондай-ақ жобаны инвесторлар тарту тұрғысынан пысықтауды жалғастыруды тапсырды.

Оқи отырыңыз: Өскемендегі май зауыты қалай 750 адамды жұмыспен қамтыды?