Алматыда дәріхана қоршауының темір істігі баланың тамағына кіріп кеткен, деп хабарлады қалалық балаларға шұғыл медициналық жәрдем орталығының баспасөз қызметі.

Оқиға 1 тамызда болған.

9 жастағы бала велосипедпен кетіп бара жатып, үшкір темірден жасалған шарбаққа құлап, денесінің бірнеше жерінен темір кіріп кеткен. Жедел жәрдем баланы дереу Алматы балалар шұғыл медициналық көмек көрсету орталығының қабылдау бөліміне жеткізген.

"Балаға аралас жарақат деген диагноз қойылды. Жабық бас сүйек-ми жарақаты, мидың шайқалуы, трахея мен ауыз қуысының зақымдалуы мен мойын жарақатын алған. Төменгі жақтың артқы кортикальды пластинкасының оң жақ бұрыш аймағы сынған", – дейді дерігерлер.

Оқи отырыңыз: Астанада НЗМ оқушысы пышақ жарақатымен ауруханаға түсті: оның жағдайы қалай

Ақ халаттылардың айтуынша, баланың жағдайы ауыр.

"Орталыққа түскенде баланың мойын аймағында ұзындығы 6 см жара болды, одан 4 см/10 см өлшемді бөгде зат - металл қоршау бөлігі шығып тұрды", -– дейді орталықтың қабылдау бөлімінің меңгерушісі Мейіржан Құрманалиев.

Дәрігерлер баланың денесінен найзаның ұшы сияқты металды алып тастау үшін 1,5 сағат ота жасаған.

"Жарақат салдарынан баланың трахеясы (2 сақинасы жыртылған), қалқанша безі, төменгі оң жақтың артқы қыртыстық табақшасының қозғалғыштығы, оң жағының шырышты қабаты қатты зақымдалған", – дейді орталықтың жақ-бет хирургі Аида Оразаева.

Қазір баланың жағдайы ауыр, жансақтау бөлімінде қарқынды терапиядан өтіп жатыр.