Абаев: Қазақ күресі мектеп бағдарламасына енгізіледі

Орталық коммуникациялар қызметінде Qazaq kuresi федерациясының президенті Дәурен Абаев ұлттық спорт түрі – қазақ күресін дамыту үшін қолға алынған шаралармен таныстырды.

"Қазақ күресінің 100 сағаттық оқу бағдарламасы дайындалды. Онда күрестің әліппесінен бастап, өзіндік спорт түрінде барлық қырлары, оқытылу жолдары қамтылған. Алдағы оқу жылы пилоттық жоба негізінде Нұр-Сұлтан қаласында 5 мектепте дене шынықтыру пәндеріне қазақ күресі енгізіледі", – деді Абаев.

Оның айтуынша, қазақ күресін барлық мектептке қосу мамандардың жетіспеушілігін туындатуы мүмкін. Сондықтан, мамандар даярлайтын Қазақ күресі академиясы ашылады.

Оқи отырыңыз: Ер қаруы – бес қару. Ұлттық ойын арқылы бес қаруды насихаттау қажет

"Академия мамандарды оқытып қана қоймай, төрешілердің біліктілігін арттыру, ұлттық күрестің ғылыми практикалық негізде зерделенуін қамтамасыз етеді. Барлық әлемдік спорттар секілді біз де қазақ күресін ғылыми тұрғыдан зерделеуіміз керек", – деді федерация президенті.

Дәурен Абаев, сондай-ақ, қазақ күресіне қатысты терминдер жүйеленіп, ғылыми әдістемелік нұсқаулықтар және бапкерлер мен спортшыларға арналған бейне нұсқаулықтар да әзірленіп жатқанын хабарлады.