Жасанды интеллектке басымдық беріледі. 2025 жылғы гаджеттерге шолу

Honor X8c смартфоны

Honor қолжетімді смартфондар қатарын кеңейтуді жалғастыруда, ал жаңа Honor X8c моделі берік корпусымен, стильді дизайнымен және теңгерімді сипаттамаларымен ерекшеленеді. Бұл шолу барысында құрылғының қандай артықшылықтары бар екенін және кімдерге лайық екенін қарастырамыз.

Дизайн және материалдар. Honor X8c классикалық тегіс қырлы корпусқа және саусақ іздеріне төзімді күңгірт артқы панельге ие. Смартфон бірнеше түсте қолжетімді, соның ішінде талғампаз қара және сергітетін көк түстер. Ең басты ерекшелігі – құлауға және суға төзімділігі, бұл осы баға санатындағы құрылғылар үшін сирек кездесетін артықшылық.

Экран. Құрылғы 6,7 дюймдік IPS-дисплеймен жабдықталған, оның ажыратымдылығы 1612×720 пиксель. Иә, ажыратымдылығы аса жоғары емес, бірақ жақсы түсті беруі мен жеткілікті жарықтығының арқасында экран ыңғайлы болып қала береді. 90 Гц жаңарту жиілігі анимациялар мен жылжытуды бірқалыпты етеді.

Өнімділік. Смартфон MediaTek Helio G85 процессорында жұмыс істейді – ең қуатты чип емес, бірақ күнделікті тапсырмалар үшін жеткілікті: хабарламалармен алмасу, әлеуметтік желілерді пайдалану, видео қарау және тіпті жеңіл ойындар ойнау. Жедел жады 6 ГБ, ал ішкі жады 128 ГБ, microSD картасымен кеңейту мүмкіндігі бар.

Камера. Негізгі 50 МП камера жарық жеткілікті кезде сапалы фотосуреттер түсіруге мүмкіндік береді. Қосымша 2 МП сенсор портреттік режимге арналған. Алдыңғы 8 МП камера бейнеқоңыраулар мен селфи жасау үшін жарамды. Төмен жарықта сурет сапасы нашарлауы мүмкін, бірақ бұл баға диапазоны үшін камерасы лайықты.

Apple Watch смарт сағаттары

Apple биыл жаңа смарт сағаттарын таныстырады. Олар: Apple Watch SE, Series 11 және Ultra 3 флагманы. Apple Watch SE дизайны жаңарып, Apple Watch Series 7-ге ұқсауы мүмкін. Бірақ корпусы пластиктен жасалады. Ал Apple Watch Series 11 және Ultra 3 дизайны өзгермесе де, жаңа функциялар қосылады. Ultra 3 сағатында 5G RedCap спутник байланысы қолжетімді болмақ. Бұл ұялы байланыс жоқ жерде шұғыл хабарлама жіберуге мүмкіндік береді.

Series 11 және Ultra 3 сағаттарына қан қысымын өлшеу функциясы енгізіледі. Смарт сағат нақты санды көрсетпей де гипертония болуы мүмкін екенін ескертеді. Бұл функция алғашында Series 10 үлгісінде пайда болуға тиіс еді, алайда құрылғының дизайны жұқа болған соң кейінге қалдырылды.

Apple Watch SE көктемде, ал Series 11 және Ultra 3 смарт сағаттары жыл соңына қарай шығады деп күтіледі. 

Samsung Galaxy Watch 8

2025 жылы Samsung компаниясы жаңа Galaxy Watch 8 смарт сағатын таныстыруды жоспарлап отыр. Бұл модельде бірнеше маңызды жаңарту бар: Micro-LED дисплей, шаршы пішінді дизайн, қандағы қант деңгейін бақылау, яғни қандағы глюкоза деңгейін өлшеуге болады. Samsung осы функцияны ұсына отырып бәсекелесі Apple-ді артта қалдырмақ. Қуаты жақсарады және жылдам зарядталады. Galaxy Watch 8 биыл жазда таныстырылуы мүмкін. 

Google Pixel Watch 4

2025 жылы Google компаниясы жаңа Pixel Watch 4 смарт сағатын таныстыруды жоспарлап отыр. Бұл модель жаңа және қуатты процессормен жабдықталуы мүмкін. Сағаттың дизайнында өзгерістер болуы ықтимал, мысалы, жөндеуге оңай болу үшін құрылымдық өзгерістер енгізілмек. Дуалды жиіліктегі GPS қолдауы локация дәлдігін күшейтеді. Фитнес мүмкіндіктері кеңейіп, жаттығу нәтижелерін тереңірек талдау мүмкіндіктері қосылуы мүмкін. 

Pixel Watch 4 жылдың екінші жартысында таныстырылады.

Apple iPad Pro (2025)

2025 жылы Apple компаниясы жаңа iPad Pro моделін таныстыруды жоспарлап отыр. iPad Pro жаңа M5 чипімен жабдықталуы мүмкін, бұл жұмыс өнімділігін айтарлықтай арттырады. Алайда кей сарапшылар бұл чип 2025 жылдың екінші жартысынан бастап өндірілетінін, сол себепті жаңа iPad Pro-ның 2025 жылдың соңына қарай таныстырылуы мүмкін екенін айтып отыр.

iPad Pro жаңа Ultra Retina XDR дисплейімен жабдықталуы мүмкін. Дисплейдің нақты сипаттамалары әлі расталмаған. Жад көлемі 16 ГБ және 32 ГБ болуы мүмкін, ал сақтау орны 256 ГБ, 512 ГБ, 1 ТБ және 2 ТБ аралығында болады деп күтіледі. Сондай-ақ, Apple Pencil жетілдіріледі. 

Samsung Galaxy Tab S9 Ultra

Samsung компаниясының ең үлкен және қуатты планшеті Samsung Galaxy Tab S9 Ultra жоғары сапалы дисплейімен және өнімділігімен ерекшеленеді.

Сипаттамасы: дисплей – 14.6 дюйм, Dynamic AMOLED 2X экраны, 120 Гц жаңарту жиілігі, Qualcomm Snapdragon 8 Gen 2 процессоры, 12 ГБ жедел жады және 256 ГБ ішкі сақтау орны, microSD картасы арқылы 1 ТБ дейін кеңейту мүмкіндігі, негізгі камера – 13 Мп, алдыңғы камера – 12 Мп. Қуаты – 11 200 мАсағ, бұл ұзақ уақыт бойы жұмыс істеуге мүмкіндік береді. Суға 1,5 метр тереңдікте 30 минутқа дейін төзімді. Планшетпен бірге S Pen қаламы беріледі. 

AirPods Pro 3

Apple компаниясы сымсыз құлаққаптарын жетілдіріп келеді. 2025 жылы AirPods Pro 3 моделін таныстыруды жоспарлап отыр. Бұл модельде жаңа H3 чипімен жабдықталады, ол H2-ге ұқсас дыбыс сапасын жақсартады, сонымен қатар шуды болдырмайды. Қуаты ұзаққа жетеді. Құлаққаптан бөлек кейстің де пішіні өзгереді. AirPods Pro 3-те дене қызуын өлшеу немесе есту қабілетін жақсартуға қатысты функциялар сияқты қосымша денсаулық сенсорлары болуы мүмкін деген қауесет бар. Ресми ақпарат әлі жарияланбағандықтан нақты сипаттамасы және қашан шығатыны белгісіз. 

Powerbeats Pro 2

Beats компаниясы Powerbeats Pro 2 құлаққаптары 2025 жылы шығарылатынын мәлімдеді. Бұл жаңа өнім сәнді дизайны мен денсаулықты қадағалау мүмкіндіктерінің арқасында AirPods-пен бәсекеге түспек. Powerbeats Pro-ның жаңа моделі алты жылдан кейін шыққалы отыр.

Powerbeats Pro 2 iOS және Android жүйелерін, Bluetooth Low Energy технологиясын қолдайды. 2400–2483,5 МГц жиілік диапазонында жұмыс істейді. Дегенмен, AirPods Pro 2 сияқты бір уақытта бірнеше құрылғыға қосылу функциясы жоқ.

Қара және ақ түсте шығады. Жүрек соғу жиілігін қадағалау, белсенді шуды болдырмау функциясы бар.

Sony WF-1000XM6

Sony компанияның ең соңғы шығып жатқан сымсыз құлаққаптары, жоғары сапалы дыбыс пен белсенді шуды болдырмау жүйесімен ерекшеленеді. Олар Dynamic Driver X технологиясын пайдаланып, кең жиілік диапазонында таза және анық дыбыс береді. Құлаққаптарда екі арнайы процессор бар, олар сыртқы шуды тиімді түрде болдырмайды. 

Құлаққаптарда Adaptive Sound Control функциясы бар, ол қоршаған ортаға байланысты шуды болдырмау деңгейін автоматты түрде реттейді. Бұл, әсіресе, ұшақта, пойызда немесе көлікте кетіп бара жатқанда тиімді болмақ. 

Sony компаниясы әлі ресми түрде WF-1000XM6 құлаққабын таныстырған жоқ. Алайда компанияның алдыңғы шығарылымдарына қарап, жаңа модельдер қашан шығатынын болжауға болады. Мысалы, Sony әдетте жаңа флагмандық сымсыз құлаққаптарды әр екі жыл сайын шығарады. WF-1000XM5 моделі 2023 жылдың шілде айында шықса, ендеше WF-1000XM6 биыл жазда таныстырылуы мүмкін. 

Samsung смарт көзілдірігі

2025 жылы Samsung алғашқы смарт көзілдірігін таныстырады. Компания көзілдірік те Galaxy Ring сияқты қолжетімді және адамдар тағатын құрылғыға айналуы керек деп есептейді. Толықтырылған шындық элементтері бар жеңіл аксессуардың кірістірілген камерасы, микрофоны мен динамигі, сондай-ақ Google-дың Gemini чатботы бар Qualcomm чипі болады, ол дауыстық пәрмендер мен қимылдарды пайдаланып басқа құрылғылармен өзара әрекеттесуге мүмкіндік береді.

Жаңа смарт көзілдіріктің салмағы шамамен 50 грамм болады. Көзілдіріктерде кіріктірілген дисплей болмайды. Олар пайдаланушымен өзара әрекеттесу үшін ым мен дауыстық командаларды пайдаланады. Қосымша мүмкіндіктер ретінде қашықтан төлем жасау және эмоцияларды тану сияқты функциялар қарастырылып жатыр. Көзілдірік биыл нарыққа шығарылуы мүмкін.