Айыпталғандардың төртеуі 6 жыл бас бостандығынан айырылса, қалған үш адам өмір бойы түрмеде жазасын өтейді, деп хабарлады Қарағанды облысының қылмыстық істер жөніндегі мамандандырылған ауданаралық сотының баспасөз қызметі.
Сот үкімі бойынша Берік Ахметов, Қайрат Ақшанов және Нұрлан Шүкілдіковтер адам өлтіруге оқталып, мән-жайларды ауырлататын жағдайларда адам өлтіргені және заңсыз аңшылықпен айналысқаны үшін өмір бойына бас бостандығынан айырылды. Ал, Берден Базаров, Батырбек Қайырбеков, Жарасхан Мырзабаев және Айдос Әкімовтерге 5 жылға аңшылықпен айналысу құқығын шектей отырып, 6 жылға бас бостандығынан айыру жазасы кесілді.
"Сондай-ақ, сот 17 киікті заңсыз атып, қоршаған ортаға 89 763 750 теңге көлемінде залал келтіргені үшін барлық сотталушыларды шығынды өтеуге міндеттеді. Ахметов, Ақшанов және Шүкілдіковтер зардап шеккен инспектор Петр Ницыкке 6,5 млн теңге, ал қаза тапқан инспектор Ерлан Нұрғалиевтің ұлына 16,89 млн теңге, інісіне 9,5 млн теңге көлемінде материалдық және моральдық шығын төлейді" делінген баспасөз қызметінің хабарламасында.
2019 жылдың қаңтар айында Қарағанды облысының Нұра ауданында "Охотзоопром" жануарлар әлемін қорғау инспекторы Ерлан Нұрғалиев браконьерлер қолынан қаза тауып, әріптесі Петр Ницык ауыр жараланған болатын.
