Халықаралық іздеу жарияланған Қазақстан азаматы Ресейден экстрадицияланды

Бас прокуратура адам өліміне әкеп соққан ауыр дене жарақатын салды деген күдікке ілінген Қазақстан азаматын Ресейден экстрадициялады.

Баспасөз қызметінің мәліметінше, күдікті Қостанайда жәбірленушінің пәтерінде бірге алкогольдік ішімдік ішіп, өзара араздық салдарынан оның басы мен денесіне көптеген соққы жасаған, салдарынан жәбірленуші қайтыс болды.

"Жауапкершіліктен құтылғысы келген күдікті қашып кеткен, сол себепті ол халықаралық іздеуге жарияланған. Күдікті іздеуде жүргенде Ресей аумағында қарақшылық шабуыл жасап, сол үшін сотталған", – делінген хабарламада.

Көрші мемлекетте жазасын өтегеннен кейін Қазақстан Республикасы бас прокуратурасының сұрауы бойынша отанына экстрадицияланып, қазіргі уақытта тергеу изоляторына қамалды.

Жәбірленушінің өліміне әкеп соқтырған ауыр дене жарақатын келтіргені үшін ол сегіз жылдан 12 жылға дейін бас бостандығынан айырылуы мүмкін.