Туу туралы куәлікті постомат арқылы жеткізу: Пилоттық жоба Алматыда іске қосылады

Цифрлық даму және Әділет министрліктері қазақстандықтарға баланың туу туралы куәлігін халыққа қызмет көрсету орталығына бармастан, постомат арқылы алу мүмкіндігіне қатысты бұйрық жобасын әзірледі. Құжат жобасы Ашық НҚА порталында жарияланды. 

Оған сәйкес, туу туралы куәлікті банк постоматы арқылы жеткізу жобасы пилоттық түрде Алматы қаласында 2025 жылдың соңына дейін жүзеге асырылады. Министрліктер пилоттық жобаны іске асыру алгоритмін де әзірлеген. 

"Пилоттық жоба шеңберінде Kaspi Bank АҚ мобильді қосымшасы арқылы өтінімді ресімдеу кезінде банк постоматтары арқылы Қазақстан Республикасының азаматтарына туу туралы куәлік беру бойынша мемлекеттік қызмет көрсету жүзеге асырылады, бұл Астана, Алматы және Ақтау қалаларында қолданыстағы тәртіпке балама нұсқа болып табылады", – делінген құжат жобасында. 

Еске салайық, ел үкіметі бұл бастама туралы биыл қаңтарда алғаш хабарлаған болатын. Ол кезде бұл қызмет 2025 жылдың IV кварталында іске қосылатыны айтылған. 

"АХАТ органдары берген электрон құжаттар бойынша – туу, қайтыс болу, неке қию және некені бұзу туралы куәліктер мен анықтамалар бойынша электрондық апостильді қолдануды дамыту жоспарланып жатыр. Жаңа өзгерістер азаматтарға аталған құжаттарды алуға және оларға бір өтініш шеңберінде апостиль қоюға мүмкіндік береді. Бұл қызметке 2025 жылдың төртінші тоқсанында қол жеткізілетін болады", – делінген болатын Үкімет хабарламасында.

Оқи отырыңыз: Қазақстанда баланың туу туралы куәлігін Kaspi постаматы арқылы жеткізетін жоба іске қосылады