Тоқаев: Биыл инфляцияны кемінде екі есеге төмендету керек

Мемлекет басшысы Қасым-Жомарт Тоқаев парламент мәжілісінің пленарлық отырысында сөз сөйледі.

"Инфляцияны тежеу қажет. Биыл оны кемінде екі есеге төмендету керек. Ең алдымен, азық-түліктің бағасын реттеу аса маңызды. Сол себепті агроөнеркәсіп кешенін және сауда-саттықты дамыту – негізгі басымдықтың бірі. Ішкі нарықты өз өнімдерімізбен барынша қамтамасыз ету қажет. Сондай-ақ ауыл шаруашылығы өнімдерінің көлемін және оның қосымша құнын арттыру керек", – деді Тоқаев.

Оқи отырыңыз: Қыркүйектен бастап асыраушысынан айырылғандарға берілетін жәрдемақы 14,5 пайызға артады

Президент тұрақты экономикалық өсімнің жылына кем дегенде 4 пайыз болуын қамтамасыз ету керек екенін де айта кетті.

"Сондықтан экономиканың даму үлгісін түбегейлі өзгертуіміз керек. Ол үшін әртараптандыру жұмысын жүйелі жүргізіп, нарық қағидаларын нығайту маңызды. Түпкі мақсатымыз – жоғары технологияға негізделген, өзін-өзі толық қамтамасыз ететін және бәсекеге қабілетті экономика құру", – деді ол парламент мәжілісінің пленарлық отырысында.