Қаңтар айының басында Алматыда болған жаппай тәртіпсіздік кезінде ауыр жарақат алғандардың бірі – Ғазиз Нұрғалымов. Ол – Алматы қаласы Әуезов аудандық Полиция басқармасының учаскелік полиция инспекторы. Ішкі істер органдарында 2014 жылдан бері жұмыс істейді, деп хабарлады Polisia.kz.
Тәртіпсіздік кезінде топтың тепкісінің астында қалған полиция аға лейтенанты бүгінде қалалық ауруханалардың бірінде ем алып жатыр. Мойынан темірмен соққы алған инспектор оқиғаның мән-жайын толықтай баяндап берді.
Оқи отырыңыз: "Аяғым терісіне ілініп тұр екен". Полиция қызметкері Қаңтар оқиғасында қалай соққы жегенін әңгімеледі
Бала кезден полицей болуды армандаған Ғазиз әрдайым азаматтардың қауіпсіздігі үшін қызмет етуге дайын.
"Аман-есен ауруханадан шықсам, жұмысымды жалғастырамын", – дейді ол.
Қаңтар айының басында орын алған тәртіпсіздікпен күрес кезінде жалпы 3 037 полиция қызметкері мен Ұлттық ұланның әскери қызметшісі түрлі жарақат алды. Қазіргі таңда 107 қызметкер әртүрлі ауыр жарақаттарымен ем алып жатыр.
Тәртіпсіздік салдарынан Ішкі істер органдарының 8 қызметкері қаза болды.
