Мемлекеттік бағдарламалардың болуына қарамастан, тұрғындардың баспана сатып алуы қолжетімсіз күйінде қалып отыр, деді сенатор Дәурен Әділбеков Сенаттағы үкімет сағатында.
"Осылайша, "Отбасы банк" АҚ-да сыйақы мөлшерлемесінің диапазоны – жылдық 3,5-7 пайыз, екінші деңгейдегі банктердің коммерциялық бағдарламалары бойынша 19 пайызға дейін және одан жоғары. Олар елдің ипотекалық қоржынының 35 пайыздан астамын құрайды", – деді депутат.
Сенатор шетелдік ипотека бағдарламаларын мысалға келтірді. Айтуынша, Еуропада үй шаруашылықтарына орта есеппен – 1,4%, АҚШ-та – 3,6%, Австралияда – 4,9% пайызбен несие береді.
Оқи отырыңыз: Депутат толық емес отбасыларға 2 пайыздық ипотека алу шарттарын жеңілдетуді ұсынды
Сонымен қатар сенатор "7-20-25" бағдарламасының кемшіліктері туралы айтты.
"Сарапшылардың пікірінше, бағдарламаның қолайлы шарттары өзектілігін жоғалтып жатыр. "7-20-25"-тің негізгі шектеуі – тұрғын үй құнының төменгі шегі және тек бастапқы нарыққа бағытталу. Бұл бағдарлама бойынша қайталама нарықта объектілерді сатып алу мүмкін емес, бұл таңдауды айтарлықтай шектейді", – деді депутат.
Дәурен Әділбеков Қазақстан ипотека қолжетімділігінің жаһандық рейтингінде әлемнің 111 елі арасында небәрі 71-орынға ие екенін еске салды.
