Бүгін Астана халықаралық әуежайы 7 жарым миллионыншы жолаушыға қызмет көрсетті. Бұл – Астана әуежайы үшін рекордтық көрсеткіш. Бұл туралы ҚР көлік министрлігі хабарлады.
"Біз Алматыдағы туыстарымызға барып, қонақ болып, үйімізге келе жатырмыз. Рейстен бізді әуежайдың басшылығының өзі күтіп алады, ерекше қонақ боламыз деп мүлде ойлаған жоқпыз. Қазірдің өзінде таңданысымызды жасыра алмай тұрмын. Мұның бәрі ұлым Мансұрдың несібесі шығар деп ойлаймын. Осылай жылы қарсы алғандарыңыз үшін мың рахмет!", – деді Сейітқазиевтер отбасының отағасы Бауыржан.
Астана халықаралық әуежайы жылдан жылға әлемдік авиациялық қоғамдастықта өзінің танымалдығы мен маңыздылығын дәлелдеп келе жатыр.
"2023 жылы Астана халықаралық әуежайынан Әзірбайжан әуекомпаниялары, RedSea, AirCairo, MaviGok әуекомпаниялары тұрақты рейстер орындай бастады. Бүгін әуежайымыздың тарихында жаңа рекорд орнады. Былтыр 6 миллион жолаушы қабылдасақ, биыл көрсеткіш 25 пайызға артып, елорда әуежайы 7 жарым миллионыншы жолаушыға қызмет көрсетіп жатыр", – деді әуежайдың Басқарама Төрағасы Ерғазы Жолдасов.
Қарашада Астана халықаралық әуежайы Terminals Holding компаниясымен бірлескен жұмысты бастады. Инвестор елорда әуежайындағы ұшу қону жолағын күрделі жөндеуден өткізуді және жолаушыларға қызмет көрсету сапасын арттыруды жоспарлап отыр. Нәтижесінде жолаушылар ағынын 2 есе көбейтіп, 14 миллионға жеткізу көзделуде.
Оқи отырыңыз: Астана әуежайы БАӘ инвесторымен бірлескен жұмысты бастады
Астана әуежайынан тәуліген орта есеппен 200-ден аса рейс орындалады. 11 айдың көрсеткіші бойынша жыл басынан 30 мың рейс орындалған.
