"Астана – кешенді әлеуметтік зерттеулер институты" жеке қоры "Хабар" агенттігінің тапсырысы аясында АЭС құрылысы мәселесі бойынша республикалық референдумда дауыс беру күні exit poll (референдум учаскелерінен шыққан азаматтар арасында сауалнама) өткізді.
"Үздіксіз ағын әдістемесінің көмегімен Қазақстанның 189 учаскесінде дауыс берген 283 519 азамат қамтылды. Олардан референдум аясында қойылған "Сіз Қазақстанда атом электр станциясын салуға келісесіз бе?" деген сұраққа қалай жауап бергені сұралды. Бұл ретте, exit poll нәтижесінде АЭС құрылысын қолдап, "иә" деп дауыс бергендер саны сауалнамаға қатысқан адамдардың 69,8 пайызын құрады. Сауалнамаға қатысқандардың 30,2 пайызы келісімін бермеген. Учаскелерге келу көрсеткіші 67,3 пайыз деңгейінде тіркелді", – деді "Астана – кешенді әлеуметтік зерттеулер институты" жеке қорының талдаушысы Әлібек Тәжібаев.
Оның айтуынша, деректердің қателегі шамамен 1,5 пайыз деңгейінде.
Қоғамдық саясат институты сайлаушылар арасында сауалнама жүргізді. Exit poll нәтижесінде қатысушылардың 72,3 пайызы АЭС құрылысын қолдаған.
"Қоғамдық саясат институты барлық өңірде экзит-пул өткізді. Сауалнама барысында 600-жен астам интервьюер мен супервайзерлер жұмыс атқарды. Экзит-пулға 44 160 азамат қатысты, сауалнама 300 дауыс беру учаскесін қамтыды", – деп атап өтті Қоғамдық саясат институтының сарапшысы Медет Өмірзақов "Астана" телеарнасының тікелей эфирінде.
Оның айтуынша, сауалнаманы Exit poll әдістемесі бойынша арнайы оқытылған кәсіби интервьюерлер жүргізген.
"Сауалнама нәтижесінде қатысушылардың 72,3 пайызы Қазақстан АЭС құрысына келісемін деп дауыс берген, ал қарама-қарсы пікірді 27,2 пайызы білдірген", – деді Медет Өмірзақов.
Еуразиялық интеграция институты республикалық референдумда еліміздің барлық өңірінде дауыс берген азаматтар арасында сауалнама жүргізді.
Дауыс берушілерге "Сіз Қазақстанда атом электр станциясын салуға келісесіз бе?" деген сұраққа қай жауап нұсқасын таңдадыңыз?" деген бір ғана сұрақ қойылды.
Exit poll таңғы 7-ден кешкі 20:00-ге дейін жүргізілді. Сауалнама 250 учаскені қамтыды, оның ішінде 159 – қалаларда, 91 – ауылдық жерлерде орналасқан. Арнайы даярланған респонденттермен face-to-face әдісі арқылы 30 546 азамат сұралды. Зерттеу нәтижелерінің қателігі 1%-дан аспайды.
Exit poll нәтижелеріне сәйкес, респонденттердің 71,8%-ы "Иә, келісемін" деп жауап берген, қалған 28,2%%-ы "Жоқ, келіспеймін" жауабын таңдаған.
