Елімізде туа біткен қан тамырлары патологиясы бар науқастардың саны артқан. Дәрігерлер лимфолог сияқты тар профильді мамандардың болмауына байланысты медициналық көмек алмайды деп дабыл қағуда. Емханаларда оған тиісті жабдықтар мен препараттар да жоқ. Сондықтан ата-аналар шетел асуға мәжбүр, деп хабарлайды Astanatv.
Үш жастағы Жәнібек гемангио дертіне шалдыққан. Ол – қан тамырларының қатерсіз ауытқуы. Анасының айтуынша, Қазақстанда бұл ауруды емдеуге арналған арнайы құрылғы да, маман да жоқ болған соң, шетелге апарған.
"Бала осы аурумен туды. Консультацияға барсақ, тек шетелде емделетінін айтты. Мәскеуге шақырды. Бардық, жағдайы жақсарғандай болды. Бірақ біздің диагноз бойынша ангиокеротоз", – дейді анасы Маржан Әбдіжаппарова.
Оқи отырыңыз: "Қазақстан халқына" қоры орфандық ауруы бар балаларға көмектесетін жобаға 9,7 млрд теңге бөлді
Жеке клиникадағы балалар хирургы Роза Қарабекова мемлекеттік емханаларда бұндай дертті алдын ала алмайтынына наразы. Жеке емханаларда емдейтін препараттар болса да, маман жоқ. маман балалар жіті бақылауда болмағандықтан дерт одан әрі асқынуы мүмкін екенін айтады.
"Бүгінгі таңда мәселе көп. Ауруды емдейтін маман тапшы. Біздің кейбір дәрігерлер пациенттерге жеке түрде қарамайды. Оларға "күтіңіз, емделіп кетеді" дегеннен басқа ештеңе айтпайды. Тағы бір мәселе елімізде заманауи препараттар жоқ", – дейді балалар хирургы.
Мәселені шешу үшін "Қазақстан халқына" қоғамдық қоры балаларға медициналық көмек көрсету үшін 20 млн 480 мың теңге бөлген. Қор талаптары ббойынша оны тек әлеуметтік осал топтағылар ала алады. Бүгінгі таңда қордың атынан 103 адам тіркелген. Оның ішінде 74 бала дәрі-дәрмек терапиясы мен лазерлік ем алып жатыр. Емдеу уақыты 6 айға дейін созылады. Дәрігерлер бірнеше процедурадан кейін науқастардың жағдайы оңалады деп сенеді.
