Қазақстанда Парламент сайлауы мерзімінен бұрын өте ме? Тоқаев жауап берді

Мемлекет басшысы Қасым-Жомарт Тоқаев "Ана тілі" басылымына берген сұхбатында Қазақстанда Парламент сайлауы мерзімінен бұрын өткізілетіні туралы алып-қашпа әңгімелерді жоққа шығарды. 

"Мұндай болжамдар бар екенін білемін. Бұл ақпарат әдейі таратылып жатыр деп ойлаймын. Біздің елде жаңа Үкімет жұмысына кіріскен бетте оның отставкаға кететіні туралы әңгіме тарайды. Парламент туралы да дәл солай деуге болады. Мен Парламент депутаттары азаматтық және саяси жауапкершілік танытып, жақсы жұмыс істеп жатыр деп ойлаймын. Ал Үкімет – ауыс-түйіске бейім құрылым. Оның құрамында түрлі жағдайға, оның ішінде Amanat партиясының және Парламенттегі басқа да партиялардың ұстанымына байланысты өзгерістер болуы мүмкін", – деді Қасым-Жомарт Тоқаев. 

Президенттің сөзінше, Парламент сайлауын мерзімінен бұрын өткізуге әзірге еш негіз жоқ.

"Сайлау заңда белгіленген мерзімдерге сәйкес өтеді. Парламент өзіне тиесілі мерзім аясында қызметін атқаруға құлықты. Ал Үкімет бекітілген бағдарламалар мен жоспарларға сәйкес әрекет етіп, оң нәтижеге жету үшін жұмыс істеп жатыр. Стратегиялық міндет – тұрақты әлеуметтік-экономикалық дамуды қамтамасыз ету, еліміздің өңірдегі көшбасшы мәртебесін нығайту", – деді мемлекет басшысы. 

Оқи отырыңыз:

• "Ештеңе істемеген адам ғана қателеспейді". Тоқаев Назарбаев дәуірінің кемшіліктері туралы айтты
• Қазақ тілін білу сәнге айналды – Тоқаев
• Алдағы бес жылдық дамуымыздың берік негізін қаладық – Тоқаев