Бүгін Астанада өткен І республикалық уағызшылар форумында "Уағыз-насихат айтудың әдебі мен мәдениеті" тұғырнамасы қабылданды, деп хабарлады ҚМДБ баспасөз қызметі.
ҚМДБ Уағыз-насихат бөлімінің меңгерушісі Батыржан Мансұровтың айтуынша, тұғырнамада халық арасында уағыз айтып, жамағатқа адал мен арамды түсіндіріп жүретін имамдарға қажетті ереже-қағидалар қамтылған.
"Бұл құжаттың мақсаты – ҚМДБ-на қарасты мешіттерде уағыз-насихат жұмыстарының бірізділігін қамтамасыз ету, дін қызметкерлеріне дініміздің құндылықтарын дұрыс бағытта дәріптеу үшін бағыт-бағдар беру, уағыз-насихат айтудың методикасына назар аудару және діни уағыз-насихаттың моделін қалыптастыру", – деп атап өтті Батыржан Мансұров.
Еске салайық, әлеуметтік желілер арқылы қате уағыз айтатын, үндеу жасайтын дін өкілдерінің көбейгенін айтып, бас мүфти Наурызбай қажы Тағанұлы ескерту жасаған болатын.
Оқи отырыңыз: "Құдайдың аманатына қиянат". Бас мүфти TikTok-та қате уағыз айтатын имамдарға ескерту жасады
"Біздің наиб-мүфтилеріміз, уағыз-насихатқа жауапты азаматтар өңірлерге барған кезде қателескен дін қызметкерлері болса, жолығып, насихат жұмыстарын жүргізеді. Әйтпесе, елді, жамағатты шатастыру – күнә. Ал имамдар бірін-бірі әлеуметтік желіде сынағаннан гөрі, қателікті ушықтырудан гөрі, алдын алып отырған дұрыс", – деген болатын бас мүфти.
