Қазақстанда 10 жылда 230 тоннадан астам каннабис тобының есірткілері жойылған, деп хабарлады Polisia.kz.
Қолайлы климаттық жағдайларға байланысты елдің оңтүстік өңірлері жабайы қарасора өсетін табиғи ошақтар. 2014 жылдан бастап Қызылорда облысында құрамында "тетрагидроканнабинол" деп аталатын есірткі бар үнді және голландиялық қарасора белсенді түрде өсіріледі.
Кейінгі 10 жыл ішінде "Қарасора" операциясы кезінде ІІМ тікұшақ техникасын қолдана отырып, әуе арқылы іздестіру іс-шараларын ұйымдастырып келеді.
Есірткі тәркілеудің талдауына сүйенсек, 10 жыл ішінде 230 тоннадан астам каннабис тобының есірткілері жойылды.
Жоғары көрсеткіш 2015-2017 жылдары болған, ол кезде 30 тоннаға дейін есірткі тәркіленген. 2019 жылдан бастап төмендеу байқалады. Операция барысында құрамында есірткі бар өсімдіктердің өсу аймақтары анықталды.
"Қаскүнемдер ыстық және құрғақ климаты бар жаңа егіс алқаптарын іздей бастады. Олардың пікірінше, мұндай жерлер полицияның назарынан тыс қалады және әуе барлауымен қамтылмайды. Бұл Түркістан, Алматы, Жетісу, Ұлытау облыстарының аумағы, сонымен қатар елдің батыс өңірі", – делінген хабарламада.
Айта кетейік, операция басталғалы бері каннабис тобының 16 тонна есірткісі жойылды, оның ішінде 12 тонна қарасора, 4,2 тонна марихуана, 450 кг гашиш бар.
