2024 жылға қарай алманың жалпы жиналуын 352,5 мың тоннаға дейін жеткізу жоспарланып отыр. Бұл ішкі нарықтың қажеттіліктерін толық қамтамасыз етеді, бұған алдыңғы жылдары салынған және 2024 жылы толық жеміс беруге шығатын алма бақтары есебінен қол жеткіземіз, деп мәлімдеді cауда және интеграция министрі Серік Жұманғарин депутаттық сауалға берген жауабында.
Министр Өзбекстан нарығына логистикалық маршруттарды құру кезінде отандық бизнес мемлекет тарапынан көмекті қажет ететін бірқатар проблемаларға тап болғанын айтты.
Оқи отырыңыз:
- Түркістан облысында алманың еуропалық сорттары қалай жеміс беріп жатыр? Фоторепортаж
- 700 мың теңгемен басталған бизнес. Ауыл кәсіпкері қалай агротуризмді дамытып отыр?
"Өзбекстан шекарасы арқылы экспорттық-импорттық операциялар кезінде тең емес жағдайлар жасалған. Жергілікті экспорттаушылар негізсіз қағазбастылыққа тап болады, бұл келісімшарттар бойынша жөнелтуді қиындатады, ал өзбек экспорттаушылары біздің нарықтарға тауарларды кедергісіз жеткізеді. Өзбекстан карантиндік қызметінің ережелеріне сәйкес Өзбекстан шекарасы арқылы барлық өсімдік шаруашылығы өнімдерін кесіп өту үшін 20-дан астам құжат қажет, ал Өзбекстан өнімдерін отандық нарықтарға экспорттау үшін тек 2 құжат қажет. Өзбекстанға алма экспорты үшін тағы бір маңызды мәселе – Өзбекстанның өздері белгілейтін импорттық өнімдерге қатысты кедендік баждарды, ҚҚС төлеу саясаты. Мысалы, барлық импортталатын алма бойынша шыққан еліне қарамастан, алманың бір килограмына кедендік баға 1 АҚШ доллары мөлшерінде белгіленді, ал алма Қытайдан, Еуропадан, АҚШ пен Қазақстаннан импортталады. Өзбекстан шекарасындағы барлық алмалардың бағасы олардың еліне 1 АҚШ долларынан бастап экспортталады және осы бағадан олардың баждары алынады", – деді Серік Жұманғарин.
Мұнымен қатар, ол Өзбекстанның мұндай саясаты ішкі нарықтағы қазақстандық алманың бағасын келісіне шамамен 500 теңгеге дейін арттырып, бағасын алыс шетелден әкелетін алмаға теңестіретінін айтты. Ал бұл өз кезегінде бәсекеге қабілеттілікті төмендетеді.
Оқи отырыңыз: Алматыда алма бағасы бір жылда 60 пайызға жуық қымбаттады
"Алайда, логистикалық бағыттарды ескере отырып, отандық бизнестің алманы 250-350 теңге шамасында жеткізуге мүмкіндігі бар. Осыған байланысты, екі ел арасындағы екіжақты қатынастар мен өзара сауданы дамыту мақсатында өзбек тарапының біздің тауарларға қойылатын талаптарын қайта қарау мәселелері пысықталуда, басқаша айтқанда, Өзбекстан шекарасы арқылы экспорттық-импорттық операциялар үшін жағдайларды теңестіру бойынша жұмыстар жүргізілуде", – деп түсіндірді премьер-министрдің орынбасары.
