Қазақстан аумағының 75 пайызында табиғи апаттардың болу қаупі бар – БҰҰ

Премьер-министр Олжас Бектенов мәжіліс депутаттарының сауалына берген жауабында Қазақстанда тұрғын үйді сақтандыруды міндеттеу мәселесі туралы айтты. 

"Біріккен ұлттар ұйымының бағалауынша, Қазақстан аумағының 75 пайызында табиғи апаттар болу қаупі бар. Алайда, тұрғын үй-жайларды табиғи апаттардан сақтандыру үлесі бүкіл Қазақстан бойынша 3,2% деңгейінде болса, Алматыда – 7,7%", – деген Олжас Бектенов көрсеткіштердің тым төмен екенін меңзеді. 

Оның сөзінше, былтырғы су тасқыны қауіп аймағында орналасқан көптеген нысандардың алдын ала сақтандырылмағанын көрсеткен. Ал сақтандырылған нысандар бойынша сақтандыру компаниялары  709,6 млн теңге төлеп берген, әлі де 132,9 млн теңге төленбек.

Оқи отырыңыз: Жылжымайтын мүлікті қандай табиғи апаттардан сақтандыруға болады? Түсіндірме

"Өткен жылы Қаржы нарығын реттеу және дамыту агенттігі мемлекеттік органдармен және халықаралық сарапшылармен бірге Қазақстанда мемлекеттік-жекеменшік серіктестік негізінде табиғи апаттар тәуекелдерін басқарудың кешенді жүйесін құру туралы ұсыныстар әзірледі. Азия даму банкінің табиғи апат кезінде бюджетке түсетін салмақты азайтуды көздейтін ұсынысы бойынша, Қазақстанның 2 қаласы мен 13 облысында тұрғын үйді міндетті сақтандыру жүйесін енгізу қажет. Бұл апат кезінде халықты қорғауды қамтамасыз етеді", – деген премьер-министр.