Қарағандыда көлік жаяу жүргіншілерді қағып кетті: бір адам қаза болды

Қарағандыда жеңіл көлік тротуарға шығып кетіп, екі адамды қақты, деп хабарлайды Қарағанды облыстық полиция департаментінің баспасөз қызметі.

Оқиға 31 наурыз күні шамамен сағат 23:00-де Бұқар жырау даңғылы бойында болды. Audi автокөлігінің жүргізушісі Дүйсенбеков көшесіне қарай бағыт алып келе жатып, жылдамдық режимін асырып, көлікті басқара алмай, жаяу жүргіншілер жолына шығып кеткен.

"Жол апаты салдарынан әйел оқиға орнында қаза болды, ал екінші адам, сонымен қатар автокөлік жүргізушісі мен оның жолаушысы түрлі жарақаттарымен облыстық клиникалық ауруханаға жеткізілді", – деп мәлімдеді Қарағанды облысы полиция департаменті тергеу басқармасының бастығы Азамат Ахметов.

Аталған факті бойынша қылмыстық іс қозғалып, тергеу амалдары жүріп жатыр.

Қарағанды облысы полиция департаменті жүргізушілерді жылдамдық режимін және жол қозғалысы ережелерін сақтауға шақырады.