Павлодарда оқушыға қол көтерген мектеп күзетшісі қызметінен шеттетілді

Павлодарда оқушыға қол көтерген күзетші қызметінен шеттетілді. Мектеп әкімшілігі күзет агенттігіне наразылық хатын жолдады, деп хабарлайды Рavlodarnews.kz.

Қалалық білім бөлімі басшысының міндетін атқарушы Жанат Асаинова №36 мектепте болған оқиғаға қатысты ресми ақпарат берді.

"Аталған мектепте күзетші қызметін атқаратын "Элекор" күзет агенттігінің қызметкері 2012 жылғы 2 қазанда туған 6 "З"-сынып оқушысын кеуде тұсынан итеріп жіберген. Мектеп әкімшілігі оқиғаға байланысты тексеріс жүргізіп, бейнебақылау камераларының жазбаларын қарады. Бейнематериалдардан күзетшінің оқушыға күш қолданғаны анық расталды. Мектепке баланың анасы келіп, 102 және 103 қызметтері шақырылды. Оқиғаның мән-жайын анықтау үшін білім ордасына полиция қызметкерлері мен "Элекор" күзет агенттігінің өкілдері келді", – деді ол.

Құқық қорғау органдары алдын ала тергеу жүргізіп, бейнежазбаларды зерттеуде және куәгерлерден жауап алып жатыр.

"Мектеп басшысынан түсініктеме алынып, балалардың қауіпсіздігін қамтамасыз ету бойынша бақылаудың әлсіреуіне байланысты оған тәртіптік шара қолданылды. №36 мектеп әкімшілігі "Элекор" күзет агенттігі басшылығына наразылық хатын жолдады. 20 ақпан күні мектеп күзетшісі қызметінен шеттетіліп, орнына басқа қызметкер тағайындалды. Сонымен қатар барлық мектеп қызметкеріне оқушылардың қауіпсіздігін қамтамасыз ету бойынша қосымша нұсқаулық берілді", – деді Жанат Асаинова.

Еске салайық, павлодарлық мектептердің бірінде мас күзетші 6-сынып оқушысын ұрған. Облыстық полиция департаменті кәмелетке толмағанға дене жарақатын салу фактісі бойынша тексеру басталды.