2023 жылдың басынан бастап мәдениет және спорт министрлігі ойын бизнесі саласындағы 6 лицензияның күшін сот тәртібімен жойды. Осыған ұқсас тағы 7 ұйымға қатысты жұмыс жүріп жатыр. Бұл туралы министрліктің баспасөз қызметі хабарлады.
2022 жылы мемлекеттік бақылау аясында жоспардан тыс тексерулер жүргізіліп, 7 әкімшілік іс қозғалды. Нәтижесінде бір ойын залы лицензиядан айырылды. Бірінші инстанция соттың шешімімен үш залдың қызметі тоқтатылды, 6 әкімшілік айыппұл салынды. Бұған қоса, алдын алу жұмыстардың қорытындысы бойынша 15 букмекерлік лицензияның күші жойылды.
"Қазіргі уақытта мәдениет және спорт министрлігінің тікелей қатысуымен ойын бизнесі, лотерея және лотерея қызметі саласындағы заңнамаға, сондай-ақ ілеспе нормативтік-құқықтық актілерге 62 түзету енгізуді көздейтін 3 заң жобасы әзірленді. Бұл шаралар заңнаманы бұзғандарға жауапкершілікті күшейтуге, жағымсыз әлеуметтік және экономикалық салдардың алдын алуға және ескертуге бағытталған", - делінген министрлік таратқан хабарламада.
Елімізде ойын мекемелерінің саны 50 еседен аса қысқарды. Бұған дейін елде 140-қа жуық казино мен 2000-нан астам ойын автоматы залы болған.
Оқи отырыңыз: "Той мен құмар ойынға несие берілмеуі керек". Алайда экономист бұған заңдық негіз жоғын айтады
Бүгінгі таңда 39 лицензияланған мекеме қалды, олар:
- 6 казино;
- 10 ойын автоматы залы;
- 17 букмекерлік кеңсе;
- 6 тотализатор.
Министрлік депутаттар тобымен бірлесіп заңсыз ойын бизнесімен және құмар ойындардың таралуымен күресу бағытында қосымша заңнама әзірлеп жатыр.
