Күзетшілердің талабын орындамаған тұрғындар жауапкершілікке тартылуы мүмкін

Енді күзетшілердің талабын орындамаған тұрғындар жауапкершілікке тартылуы мүмкін, деп хабарлайды 31 арнаның Информбюро ақпараттық бағдарламасы.

Себебі халық көп жиналатын мәдени шараларда заңбұзушылықтар жиі орын алады. Ал оны бақылау тек полицияның құзіретінде. 

Құзырлы орган өкілдері қоғамдық тәріпті толық бақылауда ұстай алмайды. Сондықтан күзет қызметіне қосымша өкілет беріледі. 

"Мәдени-бұқаралық шараларға көп адам жиналатындықтан, ұйымдастырушылар міндетті түрде күзет фирмасын жалдайды. Әдетте, кіреберісте полиция қызметкері тұрып, билеттерді тексереді, ішімдік пен басқа да тыйым салынған заттардың өтіп кетпеуін қадағалайды. Алайда, кейінгі уақытта келушілер мен күзетшілер арасында түсініспеушіліктер жиілеп кетті. Сондықтан, бұл мәселені шешу жолдарын қарастырып жатырмыз. Қоғамдық тәртіп сақталып, азаматтардың құқығы бұзылмауы үшін екі тараптың да талаптары ескеріледі", – деді ішкі Істер министрінің орынбасары Игорь Лепеха. 

Сонымен қатар енді қаруды сақтау талабы да күшейтілмек. Мәселен, күзет агенттігі жұмысын уақытша тоқтатқан болса, 15 күн ішінде қару мен оқты Ішкі істер министрлігіне тапсыруға міндеттеледі. Ал жұмысын түпкілікті тоқтатқан не қайта бастаған жағдайда, бес күн ішінде бұл туралы уәкілетті органға хабарлауға тиіс. Бастысы, күзетшілер тек объектіні қарауылдап қана қоймай, сол нысанға кіріп-шығуды бақылап, тәртіп орнатуға да жауапты болмақ.