"Көрермендерге ескерту керек". Депутат фонограмманы қолдануға тыйым салуды ұсынды

Қазақстанда әртістер осындай міндеттемеге қарамастан, көрермендерге фонограмманы пайдалану туралы ескертпейді. Бұл туралы мәжіліс депутаты Мақсат Толықбаев мәлімдеді. 

Мәжілісте "мәдениет туралы" заңға енгізілген түзетулерді талқылау барысында депутат қолданыстағы заңнама бойынша концерттерді ұйымдастырушылар көрермендерді фонограмманы пайдалану туралы хабардар етуге міндетті екенін еске салды. 

"Бұл ереже бізде мүлдем жұмыс істемейді. Сондықтан біз бұл заң жобасына фонограмманы пайдалануға тыйым салуға бағытталған түзетулер енгізуді ұйғардық, бірақ Мәдениет министрлігі оны қолдамады. Мұнда көптеген сылтау бар. Әсіресе, өңірлерде техниканың 70%-ы тозған деп айтылады. Бірақ біз бұл норманы тағы бір рет жеңілдетіп, осындай механизмді ұсындық: егер концерт залы техникамен толық қамтамасыз етілсе, онда фонограмманы пайдалануға тыйым салынады. Бірақ бұл норма да өткен жоқ. Демек, мен орындаушының әнін YouTube-тен де тыңдай аламын, диск сатып алып, көлікте тыңдай аламын, бірақ көрермен билет сатып алады, концертке барады және неге ол фонограмманы тыңдауы керек? Біз бұл талапты орынды деп санаймыз", – деді Мақсат Толықбаев. 

Оның айтуынша, министрлікте білікті дыбыс инженерлерінің жетіспеушілігі де айтылған. Алайда, бұл ең алдымен, кадрларға сұраныстың жоқтығын көрсетеді.

Мәдениет вице-министрі Айбек Сыдықов бұл мәселе бойынша әлі талқыланып жатқанын айтты. Ведомство тартылған мамандардың пікірін ескерді.

"Біз мұнда барлық мүдделі тұлғаны жинап, ашық талқылау жүргізу қажет деп келістік. 11 наурызда біз бұл мәселені шоу-бизнес өкілдерімен, мәдени мекеме басшыларымен және режиссерлермен талқылауды жоспарлап отырмыз. Біз сіз ұсынған тетіктерді егжей – тегжейлі қарастырамыз, барлық мәліметті пысықтаймыз және мәжілістегі екінші оқылымға дейін бірыңғай шешімге келеміз деп үміттенеміз", – деп жауап берді Сыдықов. 

Ол іс жүзінде концерттерде фонограмманы қолдану туралы ескертілмейтінін растады. Вице-министр норма заң жобасына енгізілген жағдайда ол жұмыс істей бастайды деп үміттенді.