Енді салықшылар мейрамханалар мен фитнес-клубтарды тексергелі жатыр

Енді салықшылар мейрамханалар мен фитнес-клубтарды тексергелі жатыр, деп хабарлайды 31 арнаның Информбюро ақпараттық бағдарламасы.

Мемлекеттік кірістер комитетінің хабарлауынша, элиталы ресторандар мен жаттығу залдары бақылауға алынады. Өйткені олар нақты табысын жасырып, салықты айналып өтудің айласын жасауы мүмкін дейді. 

Қымбат ресторандар мен элиталы фитнес-клубтардың тапқан табысы мен төлеген салығының есебі енді майшаммен қаралады. Салықшылар Қазақстан бойынша бұл саладағы кәсіпкердің бірін қалдырмай тексермекші. Ал Алматыдағы бизнесмендер, соның ішінде фитнес-клубтардың иелері бұған қарсы. 

"Мемлекет әдеттегідей халыққа қажет кәсіптерге қолдау көрсетудің орнына қыспаққа алып жатыр. Фитнес-клубтар адамдардың салауатты өмір салтын ұстануына көмектеседі. Бірақ бізді табысты шалқыған миллиардер көреді. Тексерісті негізсіз деп санаймын. Өйткені көбі ғимарат жалдап отыр, қызметкерлер саны да, табысы да әр кезде әртүрлі", – деді фитнес-клубтың директоры Татьяна Салатина.         

Ал Мемлекеттік кірістер комитетінің хабарлауынша, тексеріс мейрамханалар мен жаттығу залдарының иелері декларацияда көрсеткен ақпаратты тексеру үшін жүргізіледі. Яғни, кірісі мен шығысы туралы есебі өмірде сәйкес келмесе шара қабылданады. 

"Салық төлеуден жалтарған салық төлеушілерді әкімшілендіру жалғасып жатыр. Осы жұмыс аясында ірі премиум фитнес-клубтар мен мейрамханалар саласында декларацияда көрсетілген нақты шығындар мен кірістер, қызметкерлер санын салыстыру мақсатында хронометражды тексерулер тағайындалып жатыр", – деді ҚР ҚМ мемлекеттік кірістер комитеті басқарма басшысының орынбасары Еламан Есенбетов.