Екі күн қалды: Қазақстанда тіркелген мопедтер саны 18 мыңнан асты

Қазақстанда мопед жүргізушілеріне тіркеу мерзімі аяқталуға жақын. Ішкі істер министрінің орынбасары Игорь Лепёха елдегі мопедтердің қаншасы тіркелгенін айтты.

"Бүгін таңертеңгі жағдай бойынша ел аумағында 18 200 мопед тіркелген. Жалпы елімізде нақты қанша мопед бар екені белгісіз. Мәселен, былтыр осы санат бойынша 22 мың жүргізуші куәлігі, ал биыл 2,5 мың куәлік берілген. Дегенмен, мопеді болмаса да, осы жүргізуші куәлігін алғандар болуы мүмкін", – деді И. Лепеха парламент мәжілісінде тілшілердің сұрағына жауап бере отырып.

Оның айтуынша, жолда жүруге тек тіркелген мопедтерге рұқсат етілетінін айтты. Ал тіркелмесе, қозғалыссыз тұрады. 5 сәуірге дейін тіркелмеген мопедтер айып тұрағына қойылады.

"Бірнеше күн қалды, сондықтан халыққа қызмет көрсету орталықтарын жұмыс уақытын ұзартуды сұрадық, яғни өтініш беріп үлгергендер толық тіркелуі керек", – деді ішкі істер министрінің орынбасары.