Бүгін "Болашақ" халықаралық бағдарламасы бойынша жетекші шетелдік жоғары оқу орындарына магистратура, докторантура және резидентураға түсу үшін құжаттарды қабылдау басталды, деп хабарлайды ҚР БҒМ баспасөз қызметі.
Өтініштер 2022 жылғы 14 қазанға дейін Egov.kz мемлекеттік қызметтер порталы арқылы қабылданады. Гиперсілтеме арқылы өтіп, "Болашақ" стипендиясының конкурстық іріктеуіне қатысуға өтінім беруге болады.
Биыл тағылымдамадан өтуге құжаттарды қабылдау 2022 жылғы 5 қыркүйекте басталып, 14 қазанға дейін жалғасады. Ал конкурстық іріктеу 2022 жылғы 30 мамыр мен 30 қараша аралығында өтеді.
Осы жылы магистратура мен резидентураға 385, докторантураға 60 стипендия бөлінді.
"Болашақ" бағдарламасын қайта бағдарлау процесі іске қосылды. Инженерлік-техникалық кадрларды даярлауға басты назар аударылады. Осыған байланысты "Болашақ" бағдарламасы бойынша техникалық және IT мамандықтарға гранттар саны 60 пайызға дейін ұлғайтылды. Бұл "Инженерлік жүйелер мен желілер", "Авиация және аэроғарыштық техника. Әуе қозғалысын басқару", "Үлкен деректерді талдау", "Жаңа материалдар технологиясы", "Деректер базасын басқару", "Авиациялық техника және технологиялар", "Машина жасау", "Өнеркәсіптік автоматтандыру" және тағы басқа", – деді БҒМ халықаралық бағдарламалар орталығының басқарма төрағасы Әнуар Жанғозин.
Оқи отырыңыз: Мектептерде QR код орнатылады: Оқушылар жасырын түрде көмек сұрай алады
Жалпы биыл "Болашақ" бағдарламасы бойынша басым мамандықтар тізімінде академиялық оқуға 92, тағылымдамадан өтуге 158 мамандық қарастырылған. Еңбек нарығының үрдістерін талдау негізінде осы жылы тізілімге инновациялар, жаңа технологиялар, медицина және өнеркәсіптік инженерия, жаратылыстану ғылымдары саласындағы 40 жаңа мамандық енгізілді.
Сонымен қатар, олардың 17-сі атауларын кеңейту арқылы бұрыннан бар мамандықтарға енді. Жалпы, басым мамандықтар тізімі техникалық мамандықтармен 30 пайызға кеңейтілді.
"Болашақ" халықаралық стипендиясына конкурстық іріктеу 3 кезеңнен тұрады: кешенді тестілеу, тәуелсіз сарапшылық комиссиясы мүшелерімен жеке әңгімелесу және шетелде кадрлар даярлау жөніндегі республикалық комиссия отырысында құжаттарды қарау.
