Қытайдың Ханчжоу қаласында өтіп жатқан IV Азия Пара ойындарында дзюдодан алғаш рет алтын алған спортшыларымызды әуежайдан туған-туыстары, жанкүйерлері мен Астана қаласы Дене шынықтыру және спорт басқармасының өкілдері күтіп алды. Бұл туралы Астана қаласы әкімдігі хабарлады.
Азия Пара ойындарында 20-ға жуық пара дзюдошымыз өнер көрсетіп, 3 алтын, 4 күміс және 7 қола жүлдеге ие болды. Олардың ішінде елорда спортшыларының сапынан Ақмарал Науатбек Қазақстан тарихында дзюдодан Азия Пара ойындарында алғашқы алтынды алды. Сондай-ақ, J1 санатындағы Ерғали Шамей 73 келіде қарсылас шыдатпады. Ал Асылан Нұрдаулетов күміс жүлдеге қол созса, Бауыржан Арстанбеков қоланы місе тұтты.
"Азия Пара ойындарынға тыңғылықты дайындықты Алматы облысында өткіздім. Кейінгі жылдары салмағымда бәсекелестік қатты күшейіп келеді. Екі дүркін әлем чемпионы болсам да басты қарсыластарым Өзбекстан, Қытай спортшылары деп санаймын. Сондықтан Азия Пара ойындарында мен үшін чемпион болу оңай болмады. Әсіресе алаң қожайынымен өткен финалдық белдесу қиынға соқты. Бастапқы секундтарда ауырту әдісіне түсіп қалсам да, дер кезінде босап шықтым. Енді алда Жапонияда өтетін гран-при жарысына қатысып, Париж Паралимпиадасында чемпион болу үшін жаттығу жұмыстарына кірісемін", – деді Азия Пара ойындарының чемпионы Ақмарал Науатбек.
Оқи отырыңыз: Қазақстандық спортшылар Азия ойындарының алтын медалін қай спорт түрлерінен жиі жеңіп алады?
Пара дзюдодан ұлттық құрама Азия пара ойындарында медальдік есепте 2-орынға орнықты. Бірінші орында 5 алтын, 2 қола және 4 күміс медальмен Қытай тұрса, үшінші орынға 2 алтын 1 күміс, 3 қола медальмен Иран тұрақтады.
