18 мамырда елордадағы Триатлон паркінде Run for Autism қайырымдылық жарысы өтеді. Бұл туралы Астана әкімдігі хабарлады.
Қалалық ауқымдағы спорттық іс-шара 1 км, 2,5 км, 5 км, 10 км қашықтыққа жүгіруді ұнататындар үшін ұйымдастырылады. Оған денсаулық жағдайы бойынша жоғарыда аталған қашықтықтарды еңсере алатын 12 жастан асқан Астананың кез келген тұрғыны мен қонағы қатыса алады.
Жарыс 18 мамыр күні сағат 08:00-ден 11:30-ға дейін өтеді.
"Жарыстың мақсаты – елдегі аутизм мәселесіне жұртшылықтың назарын аудару және елордада бұқаралық спортты дамыту. Қатысушыларды тіркеу 2024 жылғы 15 мамырға дейін (қоса алғанда) жүргізіледі. Жарысқа қатысушылардың лимиті – 2 000 адам", – деп жазылған хабарламады.
Басқа қатысушы үшін бастапқы пакетті алушының атына жеке куәліктің және сенімхаттың көшірмесін еркін нысанда ұсыну арқылы ғана алуға болады.
Оқи отырыңыз: Республикалық "Ұлы дала жорығы" қашан және қайда өтетіні белгілі болды
Барлық түскен қаражат инклюзивті білім беруді дамытуға, аутизмі бар балаларды қолдауға, "Әрбір бала мектепке лайық" жобасына бағытталатын болады. Жоба туралы толығырақ www.bolashakcharity.kz сайтынан көре аласыз.
