Астанада Нұрғиса Тілендиевтің 100 жылдық мерейтойына арналған концерт болды

Роза Бағланова атындағы "Қазақконцертте" халық қаһарманы, көрнекті композитор, күйші, дирижер Нұрғиса Тілендиевтің 100 жылдық мерейтойына арналған "Әлқисса-Нұрғиса" атты мерейтойлық концерт болды, деп хабарлады Мәдениет және ақпарат министрлігінің баспасөз қызметі. 

Концерт композитордың 100 жылдығына арналған мерекелік іс-шаралар бағдарламасын ашып берді. Оның аясында ұлы тұлғаның құрметіне мемлекет басшысының атынан гүл шоқтары табыс етілді.

Шараға мәдениет және ақпарат министрі Аида Балаева, белгілі музыканттар, Қазақстанның еңбек сіңірген қайраткерлері, халықаралық байқаулардың лауреаттары, сондай-ақ қазақстандық өнер ұжымдары қатысты. Олардың қатарында Жамбыл атындағы Қазақ мемлекеттік академиялық филармониясының Нұрғиса Тілендиев атындағы академиялық фольклорлы-этнографиялық "Отырарсазы" оркестрі,  Еркеғали Рахмадиев атындағы академиялық филармониясының симфониялық оркестрі, Бақытжан Байқадамов атындағы мемлекеттік хор капелласы және танымал әншілер мен өнерпаздар бар.

"Концерттік бағдарлама бойынша көрерменге Нұрғиса Тілендиевтің қазақ музыкасының алтын қорына енген шығармалары ұсынылды. Жыл бойы Қазақстанның барлық өңірінде 100-ге жуық іс-шара  өтеді. Атап айтсақ, көрмелер, концерттер, байқаулар мен фестивальдер ұйымдастыру жоспарланған. Қазақ музыкасының дара тұлғасының мерейтойы тек елімізде ғана емес, ЮНЕСКО және ТҮРКСОЙ сияқты беделді ұйымдардың қолдауымен халықаралық деңгейде де аталып өтеді", – делінген министрліктің ресми хабарламасында. 

Мерейтойлық бағдарламаның басты шарасы – Қазақстанның Мәдениет күндері аясында Франциядағы ЮНЕСКО штаб-пәтерінде өтетін Нұрғиса Тілендиевтің 100 жылдығына арналғансалтанатты концерт. 

Сондай-ақ АҚШ-та, әйгілі Карнеги-холлда, концерт пен көрме ұйымдастырылса, Бейжіңде "Құстар қайтыпбарады" концерті аясында композитордың әндері орындалады.