Ақтөбе облысында полиция танысына заңсыз несие рәсімдеген күдіктіні ұстады

7 ақпан 2025, 12:46 Авторға хат жазу قازاقشا Qaz

Алаяқтық фактісі бойынша сотқа дейінгі тергеп-тексеру жүргізіліп жатыр.

Ақтөбе облысында полиция алаяқтық фактісі бойынша қылмыстық істі тергеп жатыр, деп хабарлайды ІІМ баспасөз қызметі.

Жәбірленуші полицияға өзіне заңсыз несие рәсімделгені туралы арызданды.

Тергеу іс-шаралары барысында күдікті әйел Қандыағаш қаласында танысының үйінде қонақта болып, "жұмыс істеймін" деген сылтаумен үй иесінің телефонын сұрап алғаны анықталды.

Оқи отырыңыз: Ақтөбе облысында 12 вагон "әлеуметтік" газ ұрлаған қылмыстық топ ұсталды

Телефонды алғаннан кейін әйел бірнеше минут ішінде екі банктен 1 миллион 350 мың теңгеге несие рәсімдеп, оларды өз анасының шотына аударған.

Алаяқтық фактісі бойынша сотқа дейінгі тергеп-тексеру жүргізіліп жатыр. Полиция департаменті мұндай заңсыз операцияларды болдырмау үшін мобильді құрылғыларды бейтаныс адамдарға сеніп беруге болмайтынын еске салады.