73 миллиард теңге: Назарбаев университеті мемлекеттен алған қаражатты тиімсіз жоспарлаған

Назарбаев университетінде 73 миллиард теңге тиімсіз жоспарланған. Бұл туралы Жоғары аудит палатасының төрағасы Әлихан Смайылов айтты.

Оның айтуынша, бұл университеттегі ең негізгі кемшілік. 

"Ең негізгі кемшіліктерді айтатын болсақ, университет әлі күнге дейін республикалық бюджеттің қаражатына тәуелді. Бұл университеттің мәртебесіне, мемлекет тарапынан берілетін көмекке және оны салықтардан босатуға қарамастан, әлі де университет 97% республикалық бюджет тарапынан қаржыландырылып отыр", – деді Жоғары аудит палатасының төрағасы.

Әлихан Смайылов оқу орнының республикалық бюджеттен кетіп, жеке қаржы көздеріне көшу керектігін айтты.

"Екінші мәселе – қолданыстағы заңнама университетті қаржылық есеп ұсынуға міндеттемейді. Бұл университет жұмысының ашықтығына кері әсерін тигізеді. Мысалы, аудиттің нәтижесі бойынша 73 миллиард теңгеге тиімсіз жоспарлау мен тиімсіз пайдалану фактілерін анықтадық. Сонымен бірге жарты миллиард теңгеге қаржылық бұзушылықтарды анықтадық", – деді ол.