2022 жылы өңірлерге республикалық бюджет қаражаты есебінен 4,5 трлн теңге бөлінеді. Аталған сома жалпы бюджет шығыстарының 28,3%-ын құрайды. Бұл туралы қаржы министрі Ерұлан Жамаубаев мәлімдеді.
"Келесі жылы түсім 13 трлн теңге көлемінде болады. Бұл 2021 жылмен салыстырғанда 431 млрд теңгеге көп. Ал мұнай саласынан тыс келетін түсім 25,1%-ға ұлғайып, 1,8 трлн теңгені құрайды. Ұлттық қор қаражатын жинақтау режиміне байланысты осы мұнай түсімін 1,3 трлн теңгеге төмендету көзделіп отыр. Сондай-ақ, келер жылы ұлттық қор тарапынан кепілдендірілген трансферт 2,4 трлн теңге болмақ. Ол біртіндеп 2024 жылға қарай 2 трлн теңгеге дейін төмендейді. Осының арқасында мұнай саласынан тыс түсімдер үлесі 56,4%-дан 2024 жылы 71,4%-ке дейін өседі", – деді қаржы министрі.
Алдын ала болжам бойынша, республикалық бюджеттің кірістері:
- 2022 жылы – 9,2 трлн теңге;
- 2023 жылы – 9,7 трлн теңге;
- 2024 жылы 10,4 трлн теңгені құрайды.
Мұнымен қатар, бюджет тапшылығын төмендету жоспарланып отыр. 2022 жылы ЖІӨ-нің 3,3%-нан, 2024 жылы 2,5%-ға дейін төмендейді. Ал мұнай саласынан тыс тапшылық ЖІӨ-нің 8,1%-нан 6,3%-ға дейін азаяды. Қаржы министрінің айтуынша, келер жылы шығыстар көбейеді.
"2022 жылы шығыс 577 млрд теңгеге көбейіп, 15,9 трлн теңге болады. Бұдан өзге, даму бюджеті 2022 жылы 1 трлн теңге болады деп жоспарланып отыр. Шығыстың 50%-ы әлеуметтік салаға тиесілі. Осының арқасында бюджеттің әлеуметтік бағасы сақталады. 2022 жылы әлеуметтік салаға 8 трлн теңге бөлінбек. Бұл 2021 жылмен салыстырғанда 515 млрд теңгеге көп. Шығыстың бұлай өсуі жыл сайынғы индекстеу, зейнетақы мен жәрдемақы алушылар контингентінің ұлғаюына, сондай-ақ, мұғалімдер мен дәрігерлердің жалақысының көтерілуіне байланысты болып отыр. Мұнымен қатар, 2022 жылы өңірлерге республикалық бюджет қаражаты есебінен 4,5 трлн теңге бөлінеді. бұл жалпы бюджет шығыстарының 28,3%-ын құрайды. Оның ішінде нысаналы трансферттері түрінде 1,8 трлн теңге, даму трансферттері түрінде 630 млрд теңге көзделді", – деп қорытты сөзін Ерұлан Жамаубаев.
Еске салсақ, үй кезегіндегі тұрмысы төмен жандарға пәтерді жалға алуға берілетін субсидияның алдын ала мөлшері белгілі болды. Мемлекеттік көмектің ең жоғары мәні Алматы қаласында: пәтердің 1 шаршы метріне – 0,55 АЕК (биыл 1 604 теңге) мөлшерінде субсидия беріледі.
