14 сәуірден бастап атаулы әлеуметтік көмек алушыларға азық-түлік ваучері беріледі

Ақмола облысының Ақкөл қаласында "Мемлекеттік атаулы әлеуметтік көмек алушыларға цифрлық азық-түлік ваучерлерін ұсыну" қызметін көрсету жөніндегі пилоттық жоба жүзеге асырылады, деп хабарлады Сауда және интеграция министрлігі Ашық НҚА порталында. 

Жоба "Әлеуметтік әмиян" сервисі арқылы халықты мемлекеттік қолдаудың монетарлық емес шаралары режимінде іске асырылады. Ол 3 айға созылып, 2025 жылғы 14 сәуірден 14 шілдеге дейінгі уақыт аралығын қамтиды. Оның барысында тиімділікті бағалау және ықтимал жақсартуларды анықтау үшін деректер жинақталады. 

Сауда және интеграция министрлігінің түсіндіруінше, бастама азаматтардың әлеуметтік осал топтарын қолдау үшін цифрлық азық-түлік ваучерлері жүйесін енгізуді көздейді және пилоттық жоба сәтті жүзеге асса, оны бүкіл Қазақстан бойынша қолдану жоспарда бар. 

"Бұл жоба Қазақстан Республикасы президентінің 2023 жылғы 16 қыркүйектегі №353 жарлығымен бекітілген мемлекет басшысының 2023 жылғы 1 қыркүйектегі "Әділ Қазақстанның экономикалық бағыты" атты Қазақстан халқына жолдауын іске асыру жөніндегі Жалпыұлттық іс-шаралар жоспарының 15-тармағын орындау мақсатында қолға алынды", – делінген министрліктің түсіндірме жазбасында. 

Оқи отырыңыз: Ауыл мұғалімдерінің табысы қалаға қарағанда 25 пайыз жоғары. Орташа жалақы қанша