Дін өкілі, ҚМДБ жанындағы "Талаба" студенттер қауымдастығының Сауд Арабия Корольдігі бойынша өкілі Абдулаxад Смановтың "Жәннаттағы хор қыздары" туралы уағызы әлеуметтік желіде тарап, пікір талқысына түсуіне байланысты Қазақстан мұсылмандары діни басқармасы арнайы мәлімдеме жасады.

"Абдулаxад Əбдісаттарұлы бұл уағызды студент кезінде, нақтырақ айтқанда, 2017 жылдың 22 маусымында айтқан. 2018 жылы шілде айында қателігін мойындап, негізі жоқ "хадисті" айтып, қоғамда түсінбеушілік тудырғаны үшін жамағаттан, жалпы тыңдаушылардан кешірім сұрады", – деп жазылған діни басқарманың мәлімдемесінде.

Бүгінде Абдулаxад Сманов ҚМДБ жанындағы "Талаба" студенттер қауымдастығының Сауд Арабия Корольдігі бойынша өкілі болып жұмыс істейді. 

Оқи отырыңыз: Махрға машина сұрау дұрыс па? Ақ некенің шарты қандай?

"Абдулахад Смановтың діни сенімі ҚМДБ ұстанымына қайшы келмейтінін мәлімдейміз", – деп мәлімдеді ҚМДБ ақпарат бөлімі.

Айта кетейік, Абдулаxад Смановтың "Жәннаттағы хор қыздары" тақырыбындағы уағызы желі қолданушыларының наразылығын тудырған еді. Уағызда көп әйелге үйленген еркекке жәннатта хор қыздары берілетіні жөнінде айтылған.