Ресей соты бұрынғы UFC чемпионы Хабиб Нурмагомедовтың 79 миллион рубль мүлкін тәркіледі. Бұған спортшының Федералдық салық қызметіне 302 миллион рубль қарызы себеп болған, деп хабарлады UzA ақпарат агенттігі.

Сот орындаушылары тәркілеген мүліктер тізімінде Нурмагомедовтың Дағыстандағы үйі, сондай-ақ 6 қымбат көлік: Ferrari California T, Mercedes-Benz AMG GTS, Mercedes-Benz S-Class, BMW 7, Toyota Land Cruiser және Toyota Tacoma көліктері бар.

Бұған дейін ФСҚ Хабиб Нурмагомедовтың салық, пеня және айыппұлдарды төлемегені үшін банк шоттарын мұздатқан болатын. Сонымен қатар, салық қызметі спортшының бірнеше компаниясын, соның ішінде туристік қызметпен айналысатын «Hikmet Travel» компаниясын жапты. Бұған ресми құжаттардағы сенімсіз ақпарат себеп ретінде көрсетілген.

35 жасты Хабиб Нурмагомедов аралас жекпе-жектен UFC чемпионы (29 жеңіс).

2018 жылы Нурмагомедов ирландиялық Конор МакГрегорды жеңіп, чемпиондық атағын сәтті қорғады. Олардың жекпе-жегі ММА тарихындағы ең көп табыс әкелген жекпе-жек болды (жалпы табыс 200 миллион доллардан астам).

2020 жылдың қазан айында Нурмагомедов мансабын аяқтағанын жариялады. 2022 жылдың шілдесінде ол UFC Құрмет Залына енгізілді.

Оқи отырыңыз: UFC президенті: Хабиб Нурмагомедов спорттық мансабын ресми түрде аяқтады