Сенат депутаты Динар Нөкетаева депутаттық сауал жолдап, мектепке дейінгі білім беру саласындағы жүйелі шешімді қажет ететін күрделі мәселелерді көтерді.

Депутат мектепке дейінгі білім беру саласындағы негізгі мәселелерге қаржыландыру, жалпы және ғылыми тәсілдер, кадрлық қамтамасыз ету салаларындағы түйткілдерді жатқызады. 

"Барлық мектепке дейінгі ұйымдарда 3 жасқа дейінгі балаларға арналған балабақша топтарын ашу уақыт күттірмейді. Жергілікті атқарушы органдар қазіргі жағдай мен болжау деректерін талдау негізінде өңірдің стратегиялық жоспарымен байланыстыра отырып, мектепке дейінгі саланы дамытудың қысқа мерзімге арналған кешенді жоспарын әзірлеуі қажет", – деді Динар Нөкетаева.

Оқи отырыңыз:

Оның ұсынысына сәйкес, өңірде жан басына шаққандағы қаржыландыру коэффициентін ұлғайту жөнінде шаралар қабылдануы тиіс. Ол сараланған және мөлшерлемелік ақы төлеу жүйесінің тетіктерін пайдалана отырып, мектепке дейінгі ұйымдардың педагогтеріне еңбекақы төлеу жүйесін қайта қарауды ұсынды.