Рамазан айына орай, пойыздардағы вагон-мейрамханалар арнайы жұмыс кестесіне ауысты, деп хабарлады "Жолаушылар тасымалы" АҚ баспасөз қызметі.

Вагон-мейрамханалар күнделікті 8:00 мен 24:00 аралығында жұмыс істейді. Оған қоса, ораза ұстаған жолаушылардың сәресі ішуіне ыңғайлы болуы үшін мейрамханалар таңғы сағат 03:30-дан 05:00-ге дейін ашық болады.

Сондай-ақ, жолаушылар пойыздарының вагон-мейрамханаларда жолаушыларға су мен құрма тегін беріледі.

"Ұлттық тасымалдаушы  Рамазан айында жолаушыларға бір-біріне түсіністікпен қарап, ашуланбауды, отырған орында тазалықты сақтауды, сондай-ақ, денсаулыққа мұқият қарауды ұсынады. Ораза ұстаған жандарға саяхат кезінде әлсіздік сезінбеу үшін сапар алдында дәрігерге қарануға кеңес беріледі", – делінген "Жолаушылар тасымалы" АҚ хабарламасында.

Еске салайық, Рамазан айы 11 наурызда басталды. Ол 9 сәуірде (қоса алғанда) аяқталады.

Ораза кестесімен осы сілтеме арқылы өтіп танысуға болады.

Оқи отырыңыз: Ораза 2024: ҚМДБ пітір садақасының мөлшерін белгіледі