Қазақстанда сұранысқа ие мамандықтарды игеруге көмектесетін онлайн курстар бар платформа ашылды, деп хабарлайды Қазақстан жастары конгресі. 

Janary курсы өзекті мамандықтар мен қабілеттерді игеруге көмектеседі.

"Онлайн білім алудың өзіндік артықшылықтары бар. Олар – адамның нақты өз қажеттіліктеріне сай білім алуы, тәжірибиеден өтуі және уақыт пен бағдарламаны өзі таңдауы. Платформада жастарға бүгінгі таңда өзекті деген қабілеттер мен мамандықтарды өз бетінше игеруге мүмкіндік мол", – деді білім платформасын жасаушылар. 

Оқи отырыңыз: Қысқа мерзімді онлайн курстардың бірыңғай порталы іске қосылды

Курс төрт бағытта жасалған:

  • SMM;
  • Web-дизайн;
  • менеджмент;
  • Soft-skills қабілеттерін игеру. 

SMM бағытын таңдай отырып әлеуметтік желідегі маркетингті ғана емес, мемдер салып, суретке дұрыс түсіруді меңгеруге болады. Web-дизайн таңдағандар үшін Python бағдарламалау курсы қолжетімді. Сондай-ақ, лэндинг, UI/UX-дизайн және моушн-дизайн жасап үйрене алады. 

"Менеджментті" таңдау арқылы цифрлық этикет пен іс-қағаздарын жүргізуді меңгеруге болады. Ал соңғысында көпшілік алдында сөз сөйлеу мен дизайн жасай білу қабілеті туралы білім жинақталған. 

Курстар тек видео сабақтардан құралады. Оқуды бастау үшін жобаның платформасына тіркелу қажет. Қатысу – тегін және жасқа байланысты шектеу жоқ. Платформаны қазірдің өзінде 200 қазақстандық пайдаланып отыр.