2024 жылғы 27 маусымда БАҚ қызметкерлерін марапаттау рәсімінде мемлекет басшысы Қасым-Жомарт Тоқаев журналистердің қоғамдағы рөліне тоқталды.

Мемлекет басшысы БАҚ өкілдерін кәсіби мерекелерімен құттықтады

"Ең алдымен, баршаңызды Бұқаралық ақпарат құралдарының қызметкерлері күнімен шын жүректен құттықтаймын! Журналист – мәртебелі мамандық. Ол – ақиқат сөздің, өткір ой мен шынайы пікірдің және әділ істің жақтаушысы. Сондықтан біз медиа саласының мамандарына әрдайым зор құрметпен қараймыз", – деді президент.

Түптеп келгенде, мемлекет те, журналист те ұлт үшін қызмет етеді, ел тағдырын шешуге атсалысады. Өйткені, ұлт баспасөзі мен ұлт мүддесі қай кезде де өзектес болған. Қазір де солай.

Оқи отырыңыз: Тоқаев Киевте Айдос Садықовқа жасалған қастандық әрекетке қатысты пікір білдірді

"Біздің мақсат-мұратымыз – ортақ. Бұл – баршаға тең мүмкіндіктер беретін Әділетті Қазақстанды құру. Мен бүгін медиа саласы мамандарының осы жолдағы қажырлы еңбектері үшін шынайы ризашылығымды білдіремін. Әлихан Бөкейхан "Газет-журнал шығаруға зор шеберлік керек" деп талап қойған. Бұл – бүкіл ақпарат саласына ортақ тұжырым. Жалпы, журналистер мемлекеттік саясатты халыққа түсіндіру ісінде айрықша рөл атқарады", – деді мемлекет басшысы.

Жалпы, мемлекет басшысы атап өткендей, мемлекеттік саясатты түсіндіруде журналистердің алатын орны ерекше.

"Сіздер тың бастамаларды жұртшылыққа жан-жақты түсіндіруге зор үлес қостыңыздар. Шын мәнінде, барлық реформаны өздеріңізбен бірге атқардық деуге болады. Бірақ өзгерістерді жүзеге асыру бір басқа, ал оны орнықтыру бір бөлек. Ол үшін қоғамдық сана түбегейлі жаңғыруға тиіс", – деді президент.